Kuhlaselwe ufata emishini ephangwa
Imoto ebintshontshiwe itholakale ngasemngceleni waseMozambique
SEKUQUBUKE ingebhe ngokuphepha kofata bebandla lamaRoma aKhatholika abahlala ngabodwana ezimishini kulandela ukuhlaselwa komunye wabo ngabantu abangaziwa. Basathuka izanya abazalwane ngokuhlaselwa kukafata emishini, waphangwa izinto zakhe, bamshaya wasala emabokoboko ebusweni qede bathatha imoto yebandla, egcine itholakala eManguzi ngasemngceleni waseMozambique.
Kubonwa ngokusa kuFata Velemseni Mkhize, obejutshwe ukulusa abazalwane baseManguzi, Parishi engaphansi kweNgwavuma Apostolic Vicariate, okuthe ngempelasonto yePhasika wahlaselwa ngabantu, bamshaya waze waquleka.
Abahlaseli bakhe bamshiye bethi ufile, bembona engasanyakazi phansi, elimele kabi nasekhanda.
Kuthiwa uphaphame wathinta ozakwabo baseMariannhill Mission, entshonalanga yeTheku, ebazisa ngokumehlele, kwathunyelwa isigijimi sayomlanda, wagcinwa eMariannhill.
Ekhuluma neLANGA omunye wofata baleli bandla, ongagunyaziwe ukukhuluma nabezindaba, uthe sibi isimo kulo fata njengoba elimale kabi ebusweni.
"Kuyimanje sihlalele ovalweni ngokuphepha kwethu singofata ezimishini zebandla njengoba sihlala sodwa.
"Lokhu okwenzeke kuFata Mkhize kusishiye sithukile ngoba kasazi ukuthi kuzophinde kuhlaselwe bani.
"Uyelulama yena njengoba efakwe esibhedlela okwakungesebandla i-St Mary, eMarianhill, lapho ethola ukwelashwa khona.
"Isimo sakhe siyathembisa kodwa kuyabonakala ukuthi imethusile le nto emehlele.
"Kasazi ukuthi usazovuma yini ukubuyela emishini abekuyona kulandela lesi sehlakalo njengoba kuthathwe izinto ezimqoka zakhe waze walinyazwa.
"Sibonga ukuthi imoto itholakele, noma kucaca ukuthi bese iwelela eMozambique," kusho lo fata.
ILANGA lihlulekile ukuthola lo fata ohlaseliwe lizama ukumthinta njengoba kuthiwa usephumile esibhedlela, uselulamela esigodlweni sabo eMariannhill Monastery.
Ucingo lwakhe belukhala lungabanjwa, negumbi lemiyalezo kuthiwa ligcwele kalikwazi ukuthatha imiyalezo.
Okhulumela amaphoyisa KwaZulu-Natal, u-Lieutenant Colonel Nqobile Gwala, usiqinisekisile lesi sigameko, ethi ummangali ungenelwe ngabalisa abathathu endlini ahlala kuyona eKuthuthuzeni.
"Laba bahlaseli bakhombe ummangali ngesibhamu, bambamba bambopha ngezindophi, bathatha i-laptop, i-cellphone nemali engadalulwanga.
"Abahlaseli bababaleke ngemoto kammangali.
"Icala lokuphanga livulwe emaphoyiseni aseManguzi lapho kuqhubeka khona uphenyo," usho kanje.