Masisukume sizilungiselele ukuguquka kwesimo sezulu
Ukubambezeleka okungenasidingo ekulungisweni kwengqalasizinda kuzoholela ekulahlekeni kwemisebenzi
ISIBHICONGO esenzeke KwaZulu-Natal sibuhlungu. Ukufa kwabantu nokulahleka kwemisebenzi kuyashaqisa. Inkulumo kamengameli (ngoMsombuluko) uMnu Cyril Ramaphosa ikhombisa indlela uhulumeni ayisukumela ngayo le ndaba, kanjalo nezifundo esizitholile ngokubhekana nezinhlekelele kule minyaka edlule. Isifundo esikhulu wukuthi iyiphi indlela yokuhlinzeka usizo ngokushesha, futhi kuqinisekiswe ukuthi lufinyelela kubantu abafanele ngaphandle kwenkohlakalo.
Kumqoka ukuthi osomabhizinisi, uhulumeni nezinhlangano zomphakathi basebenzisane. Lobu budlelwano buyinsika ekusizeni iKwaZulu-Natal, kanti iSolidarity Fund izobamba iqhaza elimqoka kulokhu.
Lesi sikhwama sesikhombisile ukuthi siyindlela esebenza kahle yokuqoqa nokusabalalisa iminikelo futhi umphakathi ungasethemba. Sihlanganisa abaholi bamabhizinisi, izinhlangano zomphakathi nohulumeni ukuqikelela ukuthi yonke into yenzeka ngendlela efanele.
Izidingo eziphuthumayo zicacile njengoba imiphakathi elinyalelwe idinga usizo oluphuthumayo futhi izama nokubhekana nokulahlekelwa kwayo. Kungithokozisile ukubona inqwaba yamabhizinisi, okukhona kuwo namalungu eBusiness Leadership South Africa, iphuthumisa usizo okukhona kulo iminikelo yemali nezimpahla kwabathintekile.
Ngiyawuncoma umsebenzi wezinhlangano ezingayenzi inzuzo, eziphuthume zayolekelela futhi eziyindlela ebalulekile yokuthi sihambise usizo kwabathintekile.
Njengoba sekushiwo ngokusemthethweni ukuthi izwe libhekene nenhlekelele, kusho ukuthi uhulumeni usuzokwazi ukuqinisekisa ukuthi usizo lufinyelela kahle ezindaweni ezithintekile, kutakulwe abasele dengwane.
Ukusetshenziswa kwama-voucher ukuze abantu bathenge impahla yokuvuselela imizi yabo, wumqondo ophusile kodwa kuzofanele kugadwe ukuthi ama-voucher afinyelela kubantu abafanele. Ukukhipha ama-voucher okuthenga impahla yokwakha yindlela enhle yokuqikelela ukuthi imali isetshenziselwa okufanele.
Ukubheka nokuthola abantu abadinga usizo yikona okumqoka, kanjalo nokuletha usizo kwabahlwempu. Kepha kumqoka nokubheka ukuthi umnotho uthinteke kanjani ngenxa yezikhukhula, ikakhulukazi emizileni yokuthutha impahla.
Umonakalo emnothweni mkhulu. Kunenqwaba yamabhizinisi acekeleke phansi nesitoko sawo, futhi angakakwazi ukuvula ngenxa yezikhukhula. Kunezigidigidi zempahla elimele. Imizila eminingi yokuthutha izimpahla ishayekile, kakuhambeki kuyona, okudala umonakalo emnothweni. Ichweba laseThekwini licekeleke phansi, kanjalo nemigwaqo engena kule ndawo.
Ukuhlenga abantu yikhona okuphuthuma kakhulu. Kepha kumqoka futhi nokuthi osomabhizinisi neziphathimandla bagxile ekuvuseleleni imizila yezokuthutha. Isimemezelo (sangoMsombuluko) sigxile kahle impela ekuvuseleleni imigwaqo, ikakhulukazi uN2 noN3.
Ukubambezeleka okungenasidingo ekubuyiseleni isimo kwesejwayelekile kuzowulimaza kakhulu umnotho, kuholele ekupheleni kwemisebenzi.
Ukuvuselela (umnotho) kuzoba mqoka njengoba sizokwakha kabusha ingqalasizinda. Imigwaqo eminingi nengqalasizinda yamanzi kulimele. Ngiyathemba le nhlekelele izokwenza sibhunge ngokuthi yini thina esiyenzayo njengezwe ukulungiselela ukuguquguquka kwesimo sezulu.
Umonakalo owenzeke KwaZulu-Natal, ukhombisa ukungalandelwa kwemithetho ekhona kanjalo nokunganakekelwa kwengqalasizinda. Kwezinye izindawo ingqalasizinda kayisebenzanga ngoba ibinganakekelwa ngendlela efanele, kodwa kukhona nokuthi eminye imizi ibiyakhiwe ngokungemthetho, kanjalo nezinye izakhiwo zisendaweni okulula ukuthi ziguguleke uma kuba nezikhukhula.
Naphezu kwalezi zimo, ngisho nengqalasizinda enakekelwayo kayikwazi ukubhekana nomphumela omubi wokuguquguquka kwesimo sezulu. Ukusweleka kwamanzi nesimo sezulu esiguquka njalo, yinto esesizophila nayo.
Umengameli ukubeke kahle ngoMsombuluko ukuthi le nhlekelele izothinta izwe lonke, nokuthi isimo sezulu singahlasela nakwezinye izingxenye zezwe.
Umengameli usungule ikhomishini ebheka ukuguquka kwesimo sezulu ngoZibandlela (December) wango-2020, ehlanganisa izinhlaka ezihlukene okukhona kuzona nosomabhizinisi. Le khomishini igxile ekuqinisekiseni ukuthi siyashintsha ekubeni wumnotho othembele kwi-fossil fuel ukuze sisebenzise lowo ongayibulali imvelo.
Lesi sibhicongo esidalwe yizikhukhula sikhombisa ngokusobala ukuthi kumele siphuthume, sibheke izinselelo ezidalwa wukuguquguquka kwesimo sezulu emnothweni wethu, kusukela kwezolimo kuya kwezokukhiqiza.
Kumele sifunde futhi sihlole ingozi kwingqalasizinda yethu, siphinde sizibuze ukuthi ngabe sikulungele yini lokhu okuzayo.
Kungaba kuhle ukuba sifunde kulesi sibhicongo esenzeke KwaZulu-Natal, okungasisiza uma sekuvuselelwa ingqalasizinda ukuthi kwenzeke ngendlela efanele.
Kungaba kuhle futhi ukuba siqikelele ukuthi siphucula izindlela zokuthi ezinye izingxenye zezwe zikwazi ukumelana kangcono nokuguquguquka kwesimo sezulu ukuze kungaphinde kuthinteke impilo nemisebenzi ngale ndlela okwenzeke ngayo ngesonto eledlule.
•