MAKHOSI ZULU
KULE nyanga kunosuku lomhla ka-27 okuzokube kubungazwa ngalo inkululeko ezweni lonke. Kuningi okuzokhulunywa ngakho okuthinta inkululeko, ikakhulukazi kwezepolitiki.
Abantu banomkhuba wokucabanga ukuthi inkululeko kumbe ukuzizwa ukhululekile, kusebenza kuphela kwezepolitiki kanti qha kakunjalo. Udaba lwenkululeko lusuka kude futhi luqala kumuntu ngamunye kuleyo ndawo azithola ekuyo kusukela ekhaya azalwa kulona, kuye nasebudlelwaneni anabo nabanye abantu aphila nabo.
Ngifisa ukusika elijikayo ngokubaluleka kokukhululeka komuntu ebudlelwaneni bothando. Kubona bonke ubudlelwano obukhona ngaphansi komthunzi welanga, kubalulekile ukuthi bobabili abantu abakulobo budlelwano bazizwe bekhululekile ngaso sonke isikhathi, kungabi bikho isimo lapho kukhona ozithola enengcindezi kumbe azizwe engasenakho ukukhululeka emoyeni.
Izinga lokuhlukunyezwa okuhlezi kukhulunywa ngakho ezinkundleni zokuxhumana, komabonakude nasemisakazweni, likucacisa ngokusobala ukuthi kwesinye isikhathi ebudlelwaneni bothando kukhona lapho abantu (abasothandweni) bezithola bengakhululekile khona.
Kuningi okungaba yimbangela yalokhu kungakhululeki. Kwesinye isikhathi kungenzeka ukuthi kunezimfihlo ezingaxoxwanga ngesikhathi uthando luselusha, ezigcina sezivela ngoba sekunezinkinga ngokuhamba kwesikhathi.
Kunabantu abafihla izingane abazithola ngaphambi kokuba bangene kulolu thando abakulona, umuntu angathi vu ukuthi unengane kuze kuvele ekuhambeni kwesikhathi kumbe kuvele ngoba sebefuna ukuba nengane bona kulolu thando. Uthole ukuthi kakwenzeki, mhlawumbe sekumele baye kubelaphi bendabuko lapho sekufike kuvela khona ukuthi inzalo yaphazamiseka ngesikhathi kutholakala ingane yokuqala, kanti leyo ngane yokuqala kakukaze nje kukhulunywe ukuthi ikhona.
Ngaleyo ndlela ubudlelwano sebuyonakala, sekuncipha ukwethembana ngoba sekukhona ongakhululekile ngomunye.
Ukuthola imfihlo ngomuntu othandana naye othi uma uyizwa ubone ukuthi ubufihlelwe yona ngamabomu, yenza ulahlekelwe yithemba ngobudlelwano okubona ngoba yenza uzibuze ukuthi yini enye ongayazi ngaye asakufihlele yona, nokuthi ubekade ezimisele ukukufihlela kuze kube yinini.
Lokhu kungakhululeki kwenzeka kakhulu uma umuntu ekufihlela into ebulimazayo ubudlelwano, ebenza bube ntekenteke. Ngiyazi ukuthi umuntu nomuntu unezinto zakhe angathandi ukuthi zaziwe yinoma ngubani, kodwa uma usungene ebudlelwaneni bothando ozimisele ngabo ukuthi bube nekusasa elihle, kubalulekile ukukhuluma ngezinto ezingase zidale inkinga uma sezivezwa emuva kwesikhathi.
Ngiyakuqonda ukuthi kunobudlelwano obuqala kungathi kabunalo ikusasa nenqubekela phambili, kodwa kuthi uma buqhubeka, bukhombise ukuthi sebungena kwelinye izinga lokukhula nokuthi kube nekusasa. Yilesi-ke isikhathi la sekudingeka khona ukuba amaqiniso ahlale obala.
Ukuveza amaqiniso kwenza ikusasa lalabo abasebudlelwaneni libe nenqubekela phambili, lakhelwe ekuthembaneni nasekutheni omunye nomunye ukhululekile ukuthi akwazi ukukhuluma ngobuthakathaka bakhe kanye namaphutha akhe ngo-ba ezizwa ephephile futhi evikelekile ngenxa yemfudumalo yobudlelwano.
Noma yibuphi ubudlelwano buyakudinga ukunakekelwa nokuphathwa ngenhlonipho, ukwethembana, iqiniso nokucabangela omunye nomunye.
Uma lezi zisekelo zingekho kumbe zintenga, lobu budlelwano buyagqilaza, bufake nengcindezi eyenza kube nokungakhululeki nokuzizwa ungaphephile ikakhulukazi imizwa nomphefumulo. Lokhu kugcina sekuphazamise yonke into, bugcine sebufadalele ubudlelwano kanti abanikazi babo bahlulwe yizinto ezincane kodwa ezinomthelela omkhulu.
Kubalulekile ukunakekela nokuvikela imizwa nemicabango yesithandwa sakho ukuze sihlale sizizwa sikhululekile una sinawe.