UNkulunkulu akazange alethwe e-Afrika ngabelungu namaSulumane
ININGI lamakholwa likholelwa ekutheni abantu abangalihambi isonto kabakholelwa kuNkulunkulu, sengathi uMvelingqangi wafika nabezizwe, bemthwele ngeqoma.
Kuthiwa uMdali, lona ebesimazi e-Afrika kusukela emandulo, bekungesiyena owangempela ngoba ubengenalo igama lesilungu. Kwathi noma sesibhajadiswa, kwathiwa kumele sinikwe amagama esilungu ngoba uMdali wezulu nomhlaba, lona bona abamaziyo, wazi isiNgisi kuphela. Ngeke akwazi ukubiza uMzikayifani noMpiyakhe. Sabe sesiphenduka oJohn noPeter kanjalo nje, awethu amagama kwangathi ayinhlamba.
Nenkolo yamaSulumane nayo injalo. Uma ukhetha yona, bakuphoqa ukuthi ushintshe igama lakho, wethiwe elesiArab. Yingakho sesaphenduka o-Abdul nje, yingoba abazali bethu bakhetha le nkolo. Elami lasekhaya, okunguMadoda, lalingafunwa nalapho lihambe khona.
Njengoba bekungamaholide amaKrestu nje, besingalali, ngenxa yokuthi kunamasonto amabili kulo mgwaqo odlula ngakwami. Bekuculwa ngapha nangapha, kuze kuyoshaya intathakusa. Umfundisi wakuleli sonto elingenhla nakwami, ungivimbe ngisathi ngiyaphuma esangweni, wangibuza ukuthi kangikholwa yini, kungani ngingekho esontweni ngezinsuku ezibaluleke kangaka emakholweni?
Ngijwayele ukuthi ngivele ngibazibe nje abantu abafana naye, kodwa benginesikhathi, ngingajahe ndawo, ngakho ngakhetha ukuma ngimuzwe ukuthi uvuthwe kangakanani okholweni lwakhe. Ngimbuzile ukuthi kungabe ufuna ukuxoxa nami ngokholo noma ngenkolo. Uke wathi ukuthula kancane, ebukeka edidekile. Ngaphinda futhi ngambuza ngenza isiqiniseko sokuthi ungizwe kahle.
Ungitshele ukuthi ukholo nenkolo yinto eyodwa, ngakhoke akawuzwisisi kahle umbuzo wami. Ngathi usho entshweni. Ngacima imoto, ngaphumela ngaphandle ukuze sixoxe kahle. Ngibe sengimchazela ukuthi ukholo kuba yinto ephakathi komuntu noMdali. Kuwuhambo lomuntu ngokomoya, noma-ke isifiso sokwazi uMvelingqangi kangcono. Inkolo yona yilena yamasonto, lapho ukhetha khona ukuthi uNkulunkulu uzomkhonza ngendlela nenqubo yamaKrestu, amaMuslimu nezinye izinkolo.
Uma ukhetha ukungalandeli nkolo, lokho kakusho ukuthi ungumhedeni, njengoba besho abantu bezinkolo ezithize. Ngikhumbula ngisahamba isikole sesonto, lokhu okwakuthiwa phecelezi yiSunday School, sitshelwa ukuthi umhedeni ngumuntu ongakholelwa kuNkulunkulu. Lokhu kusho ukuthi iningi labantu ababebizwa ngalokhu babengebona abahedeni ngempela, kodwa yingoba babengayi esontweni labelungu noma elamaSulumane.
UMvelingqangi wayaziwa futhi ekhonzwa wumhlaba wonke, umehluko nje wukuthi e-Afrika abantu babengasiboni isidingo sokusungula amasonto. Umuntu nomuntu wayezisungulela yena ubudlelwano noNkulunkulu, futhi azikhulisele yena ukholo lwakhe. Nokukhunjulwa kwamadlozi kuba yinto ebhekene nomuntu ngamunye enomndeni wakhe. Ngeke uthole abantu bezibongo ezahlukene behlangene ndawonye bethi botha izidalwa.
Kwathi uma kufika abelungu namaSulumane, kwakhiwa amasonto, kwathiwa abantu mabahlangane, bathandaze ndawonye. Banikezwa izinqubo, imithetho nemigomo okumele bamdumise ngayo uMvelingqangi.
Iningi lezimpi zokuqala emhlabeni, kusukela ngesikhathi sombuso wesonto lamaRoma, kuze kube yimanje, zisuswa yizinkolo ngoba nakhu zifuna ukuba wobhongoza. Kuyaqhudelwana ngokuthi iyiphi indlela okuyiyonayona yokukholwa noma yokukhonza.
Ngaliyekela yona leyo nto-ke isonto mina, ngoba ngikholelwa ekutheni ukholo yinto ephakathi komuntu noNkulunkulu. Ukuya esontweni kakusho ukuthi uyakholwa, kodwa kusho ukuthi ukhethe inkolo ethize oyilandelayo. UMdali nguye kuphela ozaziyo izinhliziyo zethu ukuthi ziquketheni. Umuntu okholwayo uzazi yena ngaphakathi. Ukuthi ukhethe ukulandela yiphi inkolo, kakusho lutho.