Uhoxiswe wukhuvethe kwesamabhokisa akuleli
Le midlalo iyindlela ebheke kuma-Olympic Games aseFrance
IZINDABA ezingezinhle ekhempini yeTeam SA yesibhakela eqale imidlalo ye-African Boxing Confederation Zone 4 Elite and Women Boxing Championships eMozambique izolo ngoLwesithathu, ezosongwa ngesonto elizayo.
ILANGA lithole ukuthi uphoqeleke ukubuyela kubo eNewcastle uNtokozo Ndaba njengoba kutholakale ukuthi unokhuvethe.
Ubesechithe cishe isonto lonke neqembu ekhempini ePretoria.
UNtokozo uvamise ukuhamba neqembu lesizwe asebenze njengemenenja, abuye abe ngumqeqeshi.
Wayehambile iqembu ligila izimanga kwiRegion 5 Games eLesotho ngoZibandlela (December) wonyaka odlule.
UNathi Hlatshwayo waseDundee nguye oyinhloko yabaqeqeshi beqembu lesizwe elakhiwe ngamabhokisa avela KwaZuluNatal, eGauteng, eLimpopo, e-Eastern Cape naseWestern Cape.
Ezinye izindaba ezingezinhle ezivelile ngezokuthi i-International Boxing Association, engamele isibhakela sama-amesha, ifuna amabhokisa alwa esisindweni sika-75kg.
Lokhu kuchaza ukuthi amanye amabhokisa kungenzeka angabe esahamba uma sekuyodlalwa amaOlympic Games ahlelelwa ukuba seParis, eFrance, kusukela ngomhla ka-26 kuNtulikazi (July) asongwe mhla ka-11 kuNcwaba (August) ngo-2024.
Kusolakala ukuthi uma amabhokisa egcina eshaywa yindaba yokuthi izisindo alwa kuzo kazidingeki kuma-Olympics, azongena egijima esibhakeleni esikhokhelayo.
Kuzo ezamankomane, u-Oleksandr Usyk (osesithombeni) uzobe ewubheke ngabomvu umphumela wempi yosondonzima baseBritain elindelwe ngabaningi phakathi kukaTyson Fury noDillian Whyte ezokuba ngeSonto eWembley Stadium, e-England.
UFury uzobe evikela ibhande leWorld Boxing Council (WBC) kanti u-Usyk wase-Ukraine kumele avikele amabhande amathathu, eleWorld Boxing Association (WBA), eleWorld Boxing Organisation (WBO) nele-International Boxing Federation (IBF) kuAnthony Joshua.
Okwenza u-Usyk ayilangazalele le mpi wukuthi uma emshaya uFury, uyobe esewanqobe wonke amabhande ezinhlangano ezihlonishwayo emhlabeni.
Abaningi bazomkhumbula u-Usyk exebula isithandwa sakuleli uThabiso “The Rock” Mchunu empini yeWBO eyaphela ngomzuliswano ka-9 eNew York, e-USA, ngo-2016.