URHEE ULIBONA LINZIMA IQOQO LEBAFANA LOKUHLUNGELA I-AFCON
ULIBONA linzima iqoqo okudidiyelwe kulona iBafana Bafana emidlalweni yokuhlungela i-Africa Cup of Nations (Afcon) ezokuba ngonyaka ozayo e-Ivory Coast uSibusiso “Rhee” Zuma (osesithombeni) ozakhele igama edlala kuleli qembu emi-nyakeni edlule.
Elakuleli lididiyelwe ndawonye neMorocco, iLiberia neZimbabwe kwiGroup K. Nokho iZimbabwe ngeke ilibambe iqhaza kule midlalo njengoba isamisiwe emidlalweni yomhlaba ngenxa yokugxambukela kukahulumeni wakhona kwezemidlalo.
“Kumaqoqo amaningi kuyabonakala ukuthi yimaphi amazwe asethubeni lokunqoba kodwa kweleBafana kunzima. Lokhu kuphoqa ukuba abadlali beBafana bazinikele ngokuphindiwe ukunqoba ukuze baziqophele owabo umlando ngokufaka lesi sikwati kwiAfcon,” kusho uZuma.
Uthi sekuyisikhathi sokuba ukaputeni weBafana uRonwen Williams akhombise ubuholi obuqotho ngokuhola leli qembu ayolifaka kwi-Afcon. Uthi uyamethemba njengoba edlalile naye kwiSuperSport United.
“Ngikholwa wukuthi yisikhathi sikaWilliams sokuziveza ukuthi uphetheni. Isipiliyoni sakhe simqoka kakhulu ukuze kubuye ukuzethemba kubadlali besikwati.
Kufanele asihole ngobuqotho. Ngifisa ukunxusa abalandeli bakanobhutshuzwayo bakuleli ukuba bameseke uHugo Broos ongumqeqeshi.
“Sinabadlali abaningi abahle njengoba noTebogo Mokoena ogijima kwiMamelodi Sundowns egila izimanga kuyona njengoba eyishayela amagoli amahle. Yingalesi sizathu ngibona singase senze kahle kakhulu kule midlalo yokuhlunga,” kusho uRhee.
Imidlalo yokuhlunga izoqala ngoNhlangulana (June) kanti izinsuku zayo zizomenyezelwa ngokuhamba kwesikhathi.