INGCINDEZI KUMQEQESHI WEKILABHU ENGOMAKOTI BE-PSL
INKULU ingcindezi ebhekene nomqeqeshi weSekhukhune United engomakoti kwiDStv Premiership njengoba kuvela ukuthi abaphathi kabeneme ngokungenzi kahle kwale kilabhu.
ILamontville Golden Arrows izobhekana neSekhukhune koweligi ngoMgqibelo ngo-15h00 ePrincess Magogo Stadium, KwaMashu.
Leli phephandaba lihoshe ngemithombo yalo encikene kakhulu neSekhukhune ukuthi abaphathi bayo kabeneme ngesimo sakamuva sayo njengoba ihluleka wukunqoba imidlalo.
Kuthiwa umqeqeshi wayo uMacDonald Makhubedu (osesithombeni) usenqunyelwe ugwayi katiki ukuba aguqule imiphumela kungenjalo izinyawo zizogcwala udaka.
“Abaphathi babona ukuthi sebemubekezelele kakhulu lo mqeqeshi ekubeni izinto zingasahambi kahle.
Emidlalweni eyisihlanu edlule iSekhukhune yehlulwe kwemithathu, yadlala ngokulingana kwemibili. Ukungenzi kahle kwayo sekwenze abaphathi babuka izinto ngelinye iso kwazise iyaphuma manje kwi-top 8. Uma umqeqeshi engenzi izinguquko eqenjini ngokushesha kukhona okusina kumjeqeza, abaphathi kabeneme neze,” kusho umthombo waleli phephandaba.
Nokho lo mqeqeshi ukhala ngamathuba abawamoshayo, uthi yikhona okubenzela phansi. Uthi ikilabhu yakhe idlala kahle yikhona nje ukuthi kayiwashayi amagoli. Uthi noma kanjani bazowaphendula amatafula.
Ngakolunye uhlangothi, i-Arrows ibhekwe ngabomvu ukuthi izoyiqala kanjani impilo ngaphandle komqeqeshi uLehlohonolo Seema oxoshwe emuva kokuba ezakhe zinenebulwe ngo-6-0 yiMamelodi Sundowns koweligi ngeledlule.
UMabhuti Khenyeza noVusumuzi Vilakazi abebengabasizi bakaSeema, yibona abajutshwe ukuqhubeka nomsebenzi kuze kuphele isizini.
Isiyonke imidlalo yeDStv Premiership ehlelelwe ukugijinywa ngale mpelasonto imi kanje:NGOMGQIBELO EPrincess Magogo: Golden Arrows vs Sekhukhune United 15h00.
EMbombela: TS Galaxy vs Maritzburg Utd 15h00.
EDanie Craven Stadium: Stellenbosch FC vs Kaizer Chiefs 17h00.
EPeter Mokaba: Marumo Gallants FC vs SuperSport Utd 19h30.
NGESONTO EDobsonville Stadium: Swallows vs Baroka FC 15h00.
EChatsworth Stadium: Royal AM vs AmaZulu 15h00.