Ungenisa esibhakeleni uMike Makaab
Kuthiwa uzohlela izimpi ezizoshetshwa ngemijaho yamahhashi
UQWEQWE lwe-agent ephethe izindaba zabadlali abaningi bakanobhutshuzwayo baseNingizimu Afrika, uMike Makaab (osesithombeni), kuthiwa lungena esibhakeleni esikhokhelayo ngenhloso yokufaka abaxhasi.
ILANGA lithole ngemithombo engaphakathi kwiBoxing South Africa (BSA) ukuthi izingxoxo phakathi kukaMakaab nezikhulu zale nhlangano engamele isibhakela, sezikuvuthondaba.
Kuthiwa uMakaab uhlela ukuqhamuka nesitayela lapho kuzodlalwa amahhashi bese ngemuva kwawo amaphanta ayozitika ngezimpi.
“Uzongena ngeshodi uMakaab esibhakeleni. Uhlela ukuqhamuka nento engajwayelekile yokuhlela umcimbi wamahhashi kuthi ngemuva kwawo kube nesibhakela.
"Inhloso yakhe wukuletha abaxhasi osekunesikhathi behambela kude okwelanga lasebusika esibhakeleni sakuleli.
“Usehambe elide ibanga nabaxhasi, okuthiwa nabo bakhombisa ukuwuthakasela lo mbono wakhe.
Indawo ahlela ukwenza kuyona le ngqophamlando yemicimbi yiseGreyville,” kusho umthombo.
Kuthintwa oyibamba leChief Executive Officer kwiBSA uNtsikayezwe Sithole, akavumananga futhi akaphikanga ebuzwa ngalezi zindaba.
“Kakukho okusavunyelwane ngakho kodwa baningi abantu esesixhumane nabo abafuna ukuletha abaxhasi. Engingakusho okwamanje wukuthi izinsuku zenjabulo ziseduzane kubathandi besibhakela nakumabhokisa uqobo,” kusho uSithole.
UMakaab uthe: “Kakuwona amahlebezi lawa owazwile. Ngizokhuluma kahle uma sesiziphothulile izingxoxo."
Izolo uSithole ubeseMangaung, eBloemfontein, lapho bekwethulwa khona izinhlelo zeFreedom Day nokubheka ukuthi izinhlelo zomqhudelwano weDream Team zihamba kanjani.
Uphromotha uLebo Mahoko uqhathe ingqwele kazwelonke kwi-middleweight uNkululeko “Bulldog” Mhlongo noJohn “Section 29” Bopape abazodudulana ngoLwesihlanu oluzayo.
Le mpi ngeyamagqubu kwazise kweyokuqala eyayiseThekwini yanqotshwa nguBopape ngamaphuzu. Ngenhlanhla kaMhlongo kwakungabangwa sicoco kuleya mpi eyayiqhathwe yiStarline Promotions kaZandile Malinga. Namanje inhliziyo kaMhlongo isansonsotha kwazise kwase kuphele iminyaka eyisihlanu agcina ukusuthiswa induku ngumshayisibhakela wakuleli.
Ngemuva kwempi uMhlongo, odabuka eZiqwaqweni eShowe, wakhala ngokuthi wayengekho esimweni esihle ngokomqondo ngoba wayesanda kushonelwa ngumntwana wakhe.
Kulindeleke ukuthi iBSA inike uMhlongo ibhande lesisindo sejunior middleweight. Uzoligcina unomphelo kwazise ulivikele amahlandla ayisihlanu ngaphambi kokuyolwa esisindweni se-middleweight.