IYASHUBA EYESENZO SOMQEQESHI WE-PIRATES
ISIMBA SC yaseTanzania isikuqinisekisile ukuthi izolubika ngokusemthethweni kwinhlangano eyengamele ibhola e-Africa, iCaf udaba lwayo njengoba isola umqeqeshi we-Orlando Pirates uMandla “Mhloli” Ncikazi ngokuyihlambalaza.
IBucs izobhekana neSimba emlenzeni wesibili we-quarter final yeCaf Confederations Cup ngeSonto ngo-18h00 e-Orlando Stadium, eSoweto.
Emlenzeni wokuqala obungeledlule eTanzania, iBucs iguqe ngo-1-0.
Emuva kwalo mdlalo uNcikazi ongomunye wabaqeqeshi beBucs, ushiye angalazi kwiSimba. Ukhale ngempatho engeyinhle abayinikwe yile kilabhu, waze wathi kufanele bayeke ukuphatha abanye abantu sengathi yizilwane.
Uphinde wakhala nangeVAR wathi kayizange isetshenziswe kulo mdlalo ekubeni umthetho weCaf uthi kulesi sigaba somqhudelwano kufanele ibe khona. Ubekhala ngephenathi okunqobe ngayo iSimba njengoba ethi bekungesiyo kodwa unondweba wangazixaka ngokusebenzisa iVAR.
UBarbara Gonzalez oyisikhulu esiphezulu kwiSimba, ukuqinisekisile ukuthi udaba lukaNcikazi bazolubika ngokusemthethweni kwiCaf. Uthi kungamampunge ukuthi bayiphathe ngesihluku iBucs.
“Ngenxa yezinkulumo ezingamampunge nezidicilela isithunzi sekilabhu ezenziwe ngumqeqeshi wePirates uNcikazi, sesinqume ukulufaka kwiCaf ngokusemthethweni lolu daba ngoba siyabuqonda ubumqoka nobucayi balo.
“Ngamanga aluhlaza ukuthi iPirates ihlukumezekile, kunalokho yiyona efike sekuhambe isikhathi. Ifike sekudlule ihora lonke esikhathini ebilindelwe ngaso. Phezu kwalokho yenzelwe ubuntu yanikwa ithuba lokuba iyozilolonga nendawo yokuhlala. “Njengoba siyodlala nePirates umlenze wesibili nje, sicela uhulumeni waseTanzania nowaseNingizimu Afrika ungenelele, baqinise ezokuphepha.
"Izinsongo ezenziwe ngeke sizithathe kancane, yingakho sifuna ezokuphepha ziqiniswe. Uma kungaba khona okwenzekayo ngesikhathi sihleli lapho sizobona ukuthi vele isuka kephi yonke le nto,” kuphetha yena.
ULuxolo “Lux” September wozokuxhumana kwiCaf, ucashunwe ekuqinisekisa ukuthi iVAR ibisebenza ngokuphelele kulo mdlalo.
Uthi kungamampunge ukuthi ibingasebenzi, wathi kuba kunondweba ukuthi umisa kanjani ngesigameko esisuke senzekile.