ZISAVALELEKILE IZITIMELA UKUNGENA ETHEKWINI
INGQALASIZINDA ewumgogodla emnothweni wezwe ingenye yezinto ezikhahlanyezwe kakhulu yizikhukhula zakamuva ezihlasele ezindaweni ezigudle ugu KwaZuluNatal, nase-Eastern Cape.
Echwebeni laseThekwini elenganyelwe yiTransnet, okuyinkampani engaphansi kukahulumeni, ukusebenza akukabuyeli ngokuphelele esimeni esejwayelekile -usaqhubeka umsebenzi wokukhuculula nokulungiswa komonakalo.
Kulindeleke ukuba omunye umsebenzi uthathe isikhathi esijana, njengokulungiswa kwemizila yezitimela.
Kubikwa ukuthi umzila omkhulu wezitimela ohlanganisa iTheku neGoli, usavalekile phakathi kweTheku neCato Ridge. Kanjalo futhi nomzila ophakathi kweTheku nobheke ogwini oluneningizimu kanye nobheke enyakatho neTheku nayo isavaliwe.
Ukuvaleka kwale mizila, ikakhulukazi phakathi kweTheku neCato Ridge, kuphazamisa umsebenzi wokuthuthwa kwezimpahla eziqhamuka kwamanye amazwe, nalezo eziphuma eNingizimu Afrika zithunyelwe emazweni angaphandle.
ITransnet Freight Rail (TFR) kubikwa ukuthi izama ukuhlela uku-ba izimpahla ezihamba ngezitimela ezisuka eGoli eziyiswa kwama-nye amazwe, zithululwe eCato Ridge, bese zithwalwa ngamaloli zihanjiswe echwebeni. NgoLwesibili uNgqongqoshe wezamaBhizinisi kaHulumeni uMnu Pravin Gordhan noMnu Ebrahim Patel onguNgqongqoshe woMnyango wezoHwebo, ezeziMboni, nokuNcintisana, kanye noNgqongqoshe wezokuThuthukiswa koMnotho nezokuVakasha KwaZulu-Natal, uMnu Ravi Pillay, bebesechwebeni laseThekwini, beyohlola ukuqhubeka komsebenzi wokukhuculula nokulungiselela ukuqhubeka komsebenzi ngendlela ejwayelekile.
ITransnet ibike ukuthi nakuba ukusebenza kungakabuyeli ngokugcwele esimeni esejwayelekile, kodwa izingxenye ezithile zechweba sezivulekile, seziyasebenza kanti nemikhumbi iyangena.
Phakathi kwezinto okubikwa ukuthi ziphazamise kakhulu ukusebenza kwechweba, kube wudoti omningi odudulwe yizikhukhula wayongena olwandle, wavala nemigwaqo ikakhulu uN2 ngasohlangothini oluseningizimu yeTheku. Lokhu kudale ukuba kuphazamiseke ukungena kwemikhumbi echwebeni kanye nokuhamba kwamaloli athutha izimpahla.
Omunye umonakalo omkhulu uphinde wenzeka emizileni ehamba amaloli athwala impahla, kuBayhead Road ongenela endaweni lapho imikhumbi ithululela noma ilayishela khona amakhonteyina, nase-Island View Precinct.
Ngokusho kweTransnet, sekuyahambeka manje kuBayhead Road njengoba sekuvulwe umzila ngamunye ezinhlangothini zombili zawo. Emasontweni amabili ezayo, kulindeleke ukuba lo mgwaqo ube usuvuleke ngokuphelele.