ZIZOFAHLAZWA EZINYE IZIMOTO NGENXA YOMONAKALO WEZIKHUKHULA
KUZOFAHLAZWA ezinye zezimoto ezintsha, ezilimale ngenxa yezikhukhula enkampaneni yezimoto iToyota South Africa Motors (TSAM), embonini eseProspecton, eSipingo, eThekwini.
Namanje kusamisiwe okwesikhashana ukusebenza kule nkampani njengoba kusaqhubeka uhlelo lokukhuculula nokuhlola umonakalo.
Akukacaci ukuthi izovula nini kuphinde kuqale nini ukusebenza kule mboni okukhiqizwa kuyo uhlobo lwezimoto amatekisi iSesfikile (Quantum), iToyota Hilux, iCorolla Quest neCorolla Cross, kanye ne-Fortuner.
Okhulumela iToyota, uMnu Mzo Witbooi, uthi mkhulu umonakalo owenzekile, wathi njengamanje bamatasa nomsebenzi wokukhuculula kanye nokuhlola okonakele. Uthe okwamanje abakakwazi ukwenza isilinganiso sokuthi lingakanani izinga lomthelela womonakalo.
Yinqwaba yezimoto ezakhiwa yile nkampani ezintsha ceke ezilimele kulezi zikhukhula, ezisale zintanta emanzini ngenxa yemvula enamandla. Lezi zimoto bese zilindele ukuthuthwa ziyodayiswa ezindaweni ezahlukene.
Kwinqwaba yezimoto ezilimalile, ngemuva kokuhlola umonakalo iToyota ithi ziwu-500 eziphasisiwe ukuba zilungiswe, bese zidayiswa, kanti ezinye ezingaphasanga zizohlakazwa.
UMnu Witbooi uthe akukho muntu okubikwe ukuthi ulimele ngesikhathi kwenzeka umonakalo embonini yabo. Uqhube wathi inkampani iphezu kohlelo lokuzama ukubuyisa isikhathi somsebenzi esimoshekile, kanye nokunciphisa ngokusemandleni umthelela wokubambezeleka kokusebenza okudaleke ngenxa yalesi simo.
“I-TSAM ithanda nokudlulisa amazwi enduduzo emindenini elahlekelwe ngenxa yezikhukhula,” kusho uMnu Witbooi.