Abantu bakuleli kabasawethembi uhulumeni ngenxa yezigigaba zobusela
NGENXA yomlando omude wokwebiwa nokukhwatshaniswa kwemali yizikhulu zikahulumeni nabangani bazo bamathenda kule minyaka ewu-28 eyedlule, kakumangalisi ukuthi abantu abaningi sebaphelelwa wukumethemba uhulumeni.
Lokhu kugqame bha, ngemibono yabantu ehlukene emithonjeni yabezindaba nasezinkundleni zokuxhumana ngesikhathi uMengameli Cyril Ramaphosa ememezela ukuthi isifundazwe iKwaZulu-Natal, sizothola usizo lwemali kuhulumeni kazwelonke, ukwakha kabusha ingqalasizinda ebhidlikile ngenxa yezikhukhula ezishiye kukhalwa, kwafa abantu abangaphezu kuka-400.
Umengameli ubuye wamemezela ukuba khona kwesimo senhlekelele ezweni lonke (national state of disaster), okuzosiza ukudidiyela izinhlaka zikahulumeni ukuba zisebenze ngokubambisana ukufaka isandla, kulungiswe umonakalo owenzekile.
Iningi labantu eliphawulile likhale ngokuthi le nhlekelele izosetshenziswa ngosomathuba beqembu elibusayo nabangani babo bamathenda ukweba imali yomphakathi. Abanye bancome ukuba imali ekhishwayo, inganganyelwa yizikhulu zikahulumeni, kodwa inikwe izinhlangano ezizimele ukusiza abantu abahlukumezekile. Enye yezinhlangano enconywayo ngegalelo layo lokuba wusizo emiphakathini nokuthembeka yiGift of the Givers, ejwayele ukubonakala isiza izisulu zezimo ezibucayi kuleli, nakwamanye amazwe.
Abantu bebetusa ukuba imali enikelwayo inikwe le nhlangano, kube yiyona eyenza umsebenzi wokusiza abantu, hhayi uhulumeni.
Kuqaphelekile nokuzwa ezinye izikhulu zikahulumeni nazo zincoma ukuba kube nohlaka oluzimele olunamalungu angasebenzi kuhulumeni oluzoqapha ukusetshenziswa kwemali eyabelwe ukunceda abantu abehlelwe wumshophi.
Lokhu kakumangalisi, njengoba leli zwe linomlando omude ngaphansi kukahulumeni wentando yeningi, wokukhwatshaniswa kwemali yomphakathi. Lesi sihlava sabonakala ngisho nangomngcwabo kamengameli wokuqala kahulumeni wentando yeningi, uMnu Nelson Mandela ngo-2013, omasipala nohulumeni bezifundazwe, bekhwabanisa izishaqane zemali, eyabelwa abamathenda ngokungemthetho.
Kwenzeka esifanayo nango-2020 ngesikhathi kuqala ukhuvethe, osomathuba abangenanembeza bexebula umkhomo emalini eyayabelwa ukusiza abantu ngesikhathi esinzima emlandweni wezwe.
Okusobala manje wukuthi abantu kabasawethembi uhulumeni, bancamela ukuba imisebenzi yakhe yenziwe ngabantu noma izinhlaka ezizimele. Lokhu kungenxa yezigigaba zobusela leli zwe eselidume ngazo.
Empeleni kubukeka kusazothatha iminyaka eminingi ngaphambi kokuba abantu babuyelwe wukumethemba uhulumeni ukuthi ungakwazi ukwenza imisebenzi yomphakathi ngokwethembeka nangobuqotho.
Ukwethenjwa kwezikhulu kuyobuya kuphela mhlazane zakhombisa ukuthi zibakhathalele abantu, hhayi nje izisu zazo.