Iyichilo eyabagiya ngokushona koMntwana uThembi ezinkundleni zokuxhumana
MHLELI: Ihambile-ke inkosazane yeSilo saKwaKhethomthandayo uMntwana uThembi Ndlovu, wafihlwa, futhi akasobuye awadle anhlamvana. Useyobuya azokuba yidlozi emndenini walapho ayendele khona.
Nokho kwashaqisa ukufunda nokulalela izinto ezazibhalwa ngabantu ezinkundleni zokuxhumana kungakasitheli ngisho nelanga nje elishiyile elimagade ahlabayo uMntwana wesizwe.
Ngakhumbula amazwi amnandi ayengenagqubu nanzondo, ashiwo yingwevu iNkosi uMangosuthu Buthelezi ngesikhathi kukhotheme owake waba yiBamba KwaZulu, uMntwana u-Israel Mcwayizeni kaSolomoni kaDinuzulu.
Wathi okaMkhandumba: “Ongasekho kabanjelwa.” INkosi uButhelezi yahola ithimba lezinduna, amakhosi nabantwana basendlunkulu ukuyokhala kwaNxangiphilile. Wathi uyokhalela uNdlunkulu oKaLukhwazi.
Kodwa-ke kudabukisile nxa ngibona abantu bebhala sakubhinqa, sakubhuqa, bekhombisa ukujabulela ukufa komuntu (inkosazane). Kwake kwajatshulwa kufiwe kwaZulu? Hho hhe! Laguga izwe laKwaZulu, laguga nobuhle balo.
Manje okudidayo wukuthi kakubona nabakhona kwaZulu (ababebhala), ngabantu nje bezibongo ongazi ukuthi bebelahlekelwa yini ngesikhathi ephila, bazotholani nxa engasekho. Izwe linjena nje, nezinhliziyo zabantu kazilungile, futhi bahluleka nokukufihla lokho.
Nami bengingahambisani impela nombono woMntwana wokuqhubukusha iSilo uMisuzulu esikhulekelwa nxa zonke zezwe, kuze kube khona okuphathekayo ayekuveza ukuthi kasifanelwe yisihlalo sikayise, kodwa ukuthi ngimfisele ukufa noma-ke ngijabule nxa efile, cha cha cha.
Ngizotholani? Kuzozwakala kanjani ezinganeni zakhe zifelwe kube khona abagiyayo ngokufa?
Sesiyolala ngoxolo-ke isithole soPhunga noMageba, siyokhunjulwa ngokuba yihalanjonjo loMkhosi woMhlanga, nokuwuhlelembela ikakhulukazi eNewcastle namaphethelo.
Uy-khunjulwa futhi nangokufundisa izingcwayi ukuvunula ngokwezigaba zazo; ama-tshitshi, amaqhikiza namahluma-mponjwana ukuthi bavunula ka-njani eMkhosini woMhlanga. Ezinganeni, abazukulu, izihlobo nabo bonke abesondelene nabo ngezindlela ezehlukene, ngithi dudu, balale ngenxeba. Mageba!
Phila Mthethwa EMpangeni