BAKHALA NGOKUBANJISWA UTALAGU OTHISHA BAKWA-GRADE R
SIKHULU isililo kothisha bakwaGrade-R ngokubanjiswa amaqubu enteneshe ekufakweni kwabo ohlelweni lokuhola njengabo bonke othisha abaneziqu zobuthishela eMnyangweni wezeMfundo KwaZulu-Natal.
Ngokuthola kwaleli phephandaba, othisha bakwa Grade-R bathenjiswe ukuqashwa ngokweziqu zabo kule nyanga kaMbasa (April). Lokhu bekuzodala ukuba kwenzeke ushintsho emalini abayiholayo u-R7000 kwabangenazo iziqu ezifanele, kanti abanazo bathole u-R8 300.
Omunye wothisha ofundisa kwesinye isikole, uthi baphoxekile ngesikhathi beholelwa kule nyanga lungekho ushintsho emalini abayiholayo nyanga zonke.
Uveze ukuthi babebekelwe umqamulajuqu wokuthi kufanele kufike u-2019 sebeneziqu zobuthisha i-Diploma. Uthi sebewenzile ama-Diploma, kwathiwa abaqhubeke benze i-Bachelor of Education (Bed), bazobe sebeqashwa ngokohlelo lwabo bonke othisha ngo-2022.
“Ngesikhathi sisayina izinkontileka ezintsha kulo nyaka kuNhlolanja (February), asivezwanga i-stipend kuma-form, lokho kwasinikeza ithemba lokuthi sekuzokwenzeka ushintsho uma sekuholwa kule nyanga (April).
“Sithuke kabi uma sesibona kungena le mali encane ebesiyihola. Sesixhaphazeke kakhulu, indlela okwenzeka ngayo emnyangweni kubukeka sengathi umsebenzi wethu awubonakali,” kusho uthisha.
Utshele ILANGA ukuthi ngokwezinkulumo ezikhulunyelwa phansi, sekuthiwa abalinde unyaka ka-2024. Uthi ukungafezeki kwalezi zithembiso kubenza bacabange nokuhlela imibhikisho ukuze badlulise izikhalazo zabo.
“Kulezi zithembiso abazenzile eminyakeni edlule, bathe sizothola yonke imihlomulo yothisha okuyi-Medical Aid nokunye. Sesikhathele ukuxhaphazeka ,” kusho uthisha.
Omunye wothisha uthi lolu daba kufanele alusukumele ngokushesha ungqongqoshe wezemfundo ngoba abanye abebephethe phambilini bahlulekile.
“Imali eholwa lana esifundazweni incane uma kuqhathaniswa nabanye ozakwethu bakwaGrade-R kwezinye izifundazwe. Olwethu udaba alunakiwe ngoba nezinyunyana ziyahluleka,” esho.
Okhulumela uMnyango wezeMfundo KwaZulu-Natal, uMnu Muzi Mahlambi, uthi lesi simo kasibhekene nabo bonke othisha bakwa-Grade-R.
“Bakhona abaqashiwe ngokugcwele ezikoleni zabo, zikhona izikhala ezivulekile. Ngeke siqashe uthisha emoyeni uma singakabi bikho isikhala somsebenzi esivulekile kuleso sikole afundisa kusona noma kwesinye ngoba ngokwenza lokho, kuyobe siziqhatha nomgcinimafa.
“Sizomkhokhela ngani lowo thisha esizomqasha kungekho isikhala,” kusho uMnu Mahlambi. Uthi ikhona isekhula ecacisa udaba lothisha bakwaGrade-R ngokuqashwa kwabo.