BAFISA KUNGENELELE UMNYANGO "KOLOMBANGO KUMASIPALA"
INHLANGANO esikhonya kumasipala wesiFunda uMkhanyakude kusukela ngoLwesibili, i-IFP, ithi uma inhlangano ekhishwe kulo masipala i-ANC ingenelisekile ngokuphatha kwabo, kumele iye enkantolo bahlangane khona.
Lokhu kushiwo nguMnu Thami Ntuli (osesithombeni) onguSihlalo we-IFP esifundazweni, othe bathole amahlebezi okuthi le nhlangano abayikhiphile kayeneme, wathi uma benganelisekile, yinkantolo kuphela engakwazi ukubasiza.
Usho lokhu ngemuva kokuba kuphenduke amatafula kulo masipala ngesikhathi kuhlala umhlangano okuchithwe kuwona uMnu Siphile Mdaka, njengemeya ngemuva kokuphakamisa kwamakhansela abekhona ukuthi kawasaneme ngobuholi bakhe.
Ushintsho luqale ngemuva kokuba uMasipala uMtubatuba ufake isikhalo enkantolo ePhakeme yaseMgungundlovu ngasekuqaleni konyaka ukuthi kaweneme ngesibalo samakhansela awumele eMkhanyakude.
Emasontweni amabili edlule siphumile isinqumo esivune umasipala Inkosi Mtubatuba ukuthi umhlangano okwakhethwa kuwona, wawungekho emthethweni, okuphoqe ukuthi esontweni eledlule, lo masipala (Inkosi Mtubatuba), uphakamise amagama amakhansela ayowumela eMkhanyakude.
Lokhu kwenze i-IFP yagcina isinamakhansela amaningi kuneANC ebeyiphethe ngokubambisana ne-NFP.
UMkhandlu woMkhanyakude wakhiwe yizihlalo ezingu-35, i-IFP ineziwu-18, kanti njengoba ivota ngokuba-mbisana ne-EFF yona enezihlalo ezintathu uma sezihlangene ziba ngu-21.
UMnu Tim Moodley uqokelwe kwesokuba yimeya kulo masipala. Kuwona lo mhlangano kube sekukhishwa uDkt Siyabonga Ntuli obeyimenenja ebambile, kwabekwa uMnu Mxolisi Nkosi.
Ethintwa uMnu Nkosi, uvumile ukuthi ngoLwesibili i-IFP imnikeze isikhundla sokubamba njengemenenja, wasamukela.
UMnu Ntuli uthe bayitholile nemibiko yokuthi ngoLwesithathu kunezikhulu ezithile ezihlasele kulo masipala, zifuna uvalwe ngoba zithi kakufanele ngabe kukhona abe-IFP, wathi banethemba lokuthi uMnyango wezokuBusa ngokuBambisana nezoMdabu uzongenelela kulolu daba.
Okhulumela i-ANC eFar North, uMnu Verus Ncamphalala, uthe njengenhlangano kawukho umhlangano abawaziyo obe seMkhanyakude.
“Kuyimanje imeya uMnu Mdaka, uSomlomo uMnu Mkhombo nemenenja ebambile uDkt Ntuli basemahhovisi bayasebenza,” kusho uMnu Ncamphalala.