KUFUNWA ABABULALE INDODAKAZI YOWE-EFF
KUNXUSWE abangaba nomkhondo ngabasolwa ekubulaweni kwendodakazi kalowo owayenguNobhala Jikelele we-EFF, uMnu Godrich Gardee, ngemuva kokutholalaka kwesidumbu sayo.
UNkz Hillary Gardee (28), utholakale ngemuva kwezinsuku ezine enyamalele. Kuzokhumbuleka ukuthi kusukela ngempelasonto ngisho nasezinkundleni zokuxhumana bekusabalele isithombe sale ntokazi okuvele ukuthi inyamalalele endaweni yaseMbombela ngemuva kokuhamba ekhaya iya esitolo.
Bekukhona nezithombe zayo ibonakala isesitolo esithile, iqhuba inqola nokuthiwe kakwaziwa ukuthi isiphume kuleso sitolo kube sekwenzakalani.
Ngokusho kukaSinawo Tambo okhulumela i-EFF, noqokwe njengokhulumela umndeni wakwaGardee, isidumbu sale ntokazi sitholakale ngoLwesibili ekuseni endaweni engamakhilomitha awu-60 nalapho igcine ukubonakala khona.
“Njengamanje kakukaqondakali ukuthi kwenzakaleni kuyena kodwa kubonakala sengathi kukhona abamthumbile, bambulala,” kusho yena.
Uqhube wathi umndeni wakwaGardee usakhungathekile ngalesi sigameko, ucela ukunikwa isikhathi ukuba ukwazi ukubhekana nalesi simo.
“Umndeni udlulisa ukubonga okukhulu kulabo abebelekelela ngesikhathi esabhekwa nangothando abalukhombise umndeni,” esho.
I-EFF idlulise amazwi okududuza umndeni wakwaGardee.
“Ukudlula kwakhe emhlabeni kunzima kakhulu nakuyise okuyimanje usazama ukwamukela okwenzekile endodakazini yakhe njengoba ibulewe kabuhlungu kangaka.”
Okhulumela amaphoyisa aseMpumalanga, uColonel Donald Mdhluli, uthe isidumbu sikaNkz Gardee sitholwe ngabantu abebehamba esigangeni.
“Bebenqamula beya emsebenzini, babona isidumbu sowesifazane sidindilizile esigangeni. Kube sekutholakala ukuthi nguNkz Gardee lona obekade kubikwe ukuthi unyamalele ngoba kubonakala nangezingubo anyamalale ezigqokile,” kusho yena. Kunxuswa abangaba nolwazi ngokwenzeke kuNkz Gardee ukuba bashayele inombolo ethi 08600-10111.