Kayikapheli iCovid-19, masivikele umnotho
KUYISHWA ukuthi emuva kweminyaka engaphezu kwemibili kwahlasela iCovid-19, yisigamu kuphela abantu abadala abagonywe ngokugcwele.
Lokhu sekuzohlupha thina manje njengoba kuqina ngamandla ukuhlasela kwaleli gciwane okwesihlanu.
Inselelo yamabhizinisi wukuthi azomelana kanjani nomthelela wokuhlasela kwegciwane okwesihlanu, ebe eqhubeka nokugxila ekwakheni kabusha emuva kwemigomo yokhuvethe ebinqinda ukusebenza kwawo iminyaka emibili.
Kungabe kumele izinkampami zizame ukunyusa isibalo sabantu abagomile ngokuphoqa ukuthi abantu bagome?
Noma ngabe ezinkampanini baningi abantu abagomile, kungabe kumele abezinkampani bangabe besavuma eminye imithetho emayelana nokunqanda ukubhebhetheka kweCovid-19 ezobanqinda?
Kakuyona imibuzo okulula ukuyiphendula lena. Kumele sibe nendlela yokuqinisekisa ukuqhubeka nokuphepha ezinkampanini zethu futhi sibe sikhathalele nomphakathi.
Umonakalo odalwe yiCovid-19 mukhulu. Kunabantu abangu-100 195 abangasekho, kanti abangu3.7 million batheleleka yilo mkhuhlane. Bangu-19.6 million kuphela abantu abadala abagome ngokuphelele, okucishe kube wuhhafu wesibalo sabantu abadala.
Uma siziqhathanisa namazwe afana neBrazil (kugome u-77% wabantu), iBangladesh (u-71%) neVietnam (u-80%).
Izindaba ezinhle wukuthi labo abasengozini kakhulu bavikeleke kangcono, u-70% walabo abangaphezu kweminyaka ewu-60 usugomile.
Lesi siqubu sesihlanu singesokuqala lapho singalawulwa khona wumthetho wezinhlekelele. Uhulumeni usushaye umthetho ozowuvumela ukuthi usebenzise inqwaba yemithetho yeCovid-19 enqindanayo nanoma ngabe yisikhathi esingakanani, ngaphandle kokudinga imvume kangqongqoshe noma umthetho wezinhlekelele.
Lokhu kuthinta neminye imigomo, hhayi nje iCovid-19 kuphela. Amandla anjena kulula ukuthi asetshenziswe wuhulumeni budlabha, ngakho sizimisele ukuqapha ngeso lokhozi ukuthi asetshenziswa ngendlela efanele.
Imithetho yokunqanda ukhuvethe isike yaphambuka phambilini. Kwake kwavalwa ukudayiswa kukagwayi nesesazi manje ukuthi kakwenzanga mehluko ekunqandeni ukubhebhetheka kwesifo, kunalokho kwachumisa imboni kagwayi owumkokotelo futhi izwe lalahlekelwa wu-R5.8 billion wentela engena kuhulumeni.
Uma sesihlasele ngamandla lesi sikhawu sesihlanu, sizodinga ukucophelela ukuthi sivikele impilo yabantu ngaphandle kokuphazamisa amabhizinisi.
Osomabhizinisi bazama ukujwayela isimo futhi abaningi baphucula imigomo yabo mayelana nokugonywa kwezisebenzi. Sekukaningi iKhomishini exazulula izinkinga zezisebenzi nabaqashi (iCCMA) ivuna abaqashi ngesikhathi kukhona izisebenzi ebezingafuni ukugoma.
Kukhona izindlela zomthetho esezikuvezile ukuthi izisebenzi kumele zigome noma ziveze ubufakazi bokuthi kazithelelekile. Kuzodingeka umuntu ahlolwe njalo emuva kwamasonto amabili. Nokho futhi abaqashi banelungelo lokubaxosha labo abenqabayo ukugonywa.
Umsebenzi womqashi ucacile; kufanele bavikele impilo nokuphepha kwezisebenzi.
Uhulumeni naye utotobela ngakhona. Sekuvumelekile ukubuthana kwabantu ezindaweni ezifana nasezinkundleni zemidlalo kodwa kungeqi ku-50% wesibalo leyo ndawo ekwazi ukusimumatha, inqobo nje uma abazohlangana bezoveza izitifiketi zokuthi bagomile noma ubufakazi bokuthi kabanalo igciwane ngaphambi kokungeniswa.
Ababuthelana endaweni evalelekile kabakwazi ukweqa ku-1000, besekuthi endaweni evulelekile khona bangeqi ku-2000, baqhelelane futhi bafake izifonyo.
Ngingathanda ukubona lokhu kwenziwa nakwezinye izinto, njengoba sibona ukuthi ezindaweni eziningi emhlabeni, yonke into ngisho nasemisebenzini izinto seziyakwazi ukubuyela kokwejwayelekile, yinqobo nje uma abantu bezoveza ubufakazi bokuthi bagomile noma kabanalo igciwane.
Njengoba sijwayela singumphakathi ukuphila naleli gciwane, kumqoka ukuthi singaphonsi ithawula ngemigomo, ngoba kuseyiyona ndlela ehamba phambili yokunqanda leli gciwane.
Bucacile ubufakazi bokuthi ukugoma kuyawanciphisa (noma kungawaqedi nya) amathuba okutheleleka, kanjalo nokuthelela abanye. Kuyawanciphisa kakhulu amathuba okuthi ugule ubangwe nezibi okuyisimo esiphungula umthwalo kwezempilo.
Ukuzama ukusheshisa ukugoma abantu kunzima, ngenxa yezinkoleloze, iningi lazo eziwumbhedo ofafazwa ezinkundleni zokuxhumana. Kuyangithusa ukuthi abantu bakuleli bashesha kangaka ukukholwa wumbhedo okhulunywayo.
Sidinga imiyalezo ezokhuluma nabantu ngokuhlukana kwabo, imiyalezo efundisayo ngesayensi futhi icacise ngamampunge agcwele izwe.
Umbiko okhishwe wuMnyango wezeMpilo ngomhla ka-25 kuMbasa (April) osihloko sithi; Covid-19 and Vaccination Social Listening Report, unohlu lwezinto ezingelona iqiniso nedala abanye babemanqika ukugoma.
Enye yezinto ezivelayo wukuthi: “ICovid-19 isiphelile” ngakho kakuseyona into okufanele kukhathazekwe ngayo kakhulu. Cishe lena ngenye yezinto ezingelona iqiniso eyingozi kakhulu.
Ngokusho kweWorld Health Organization: “Lusaqhubeka ubhubhane. Igciwane kalikafinyeleli lapho sekwaziwa khona ukuthi lihlasela noma libhebhetheka nini. Lisengadala umonakalo.”
Ngo-2020, okuwunyaka wokuqala wale mithetho eyayiqine kakhulu, umnotho wehla ngo-7%. Kasikadluli lapho njengoba isibalo sabangasebenzi simi ku-35.3% besekuthi esentsha sibe wu-66.5%.