EZOMNOTHO:
UKUSHICILELWA kwemininingwane yomholo yomphathi omkhulu wenkampani yezokumbiwa phansi, i-SibanyeStillwater, sekususe omkhulu umsindo kuleli. Kuvele ukuthi uMnu Neal Froneman, ongumphathi wale nkampani engabanikazi bezimayini zegolide neplatinum kuleli nakwamanye amazwe, uthole isamba esiyizigidi ezingamakhulu amathathu (R300 million) nyakenye.
Inkampani yakwaSibanye inezimayini kuleli, eMelika nase-Europe. Ingenye yezinkampani zokumbiwa phansi ezinkulu ezinezimpande kuleli.
Umsindo osuswe yilolu daba unemisuka eminingi. Omkhulu uphathelene nomlando wezokumbiwa phansi kuleli, okuyimboni eyasimama ngezithukuthuku zabamnyama.
Kunemibhalo eminingi ebeka obala ukuthi kwabacacela zisuka abanikazi bezimayini ukuthi ukuze benze inzuzo ngokumba igolide, kumele bacindezele abamnyama, ngokubaholela imali ephansi. Okwesibili, abomdabu bavinjwa ukuthi bangenzi imisebenzi esezingeni eliphezulu, yabekelwa ondlebe zikhanya ilanga kuphela.
Omunye umsuka walo msindo uphathelene nokwehluleka kukahulumeni wentando yeningi ukuthuthukisa isimo semisebenzi kanye nezindawo lapho kuhlala khona izisebenzi zasezimayini.
Owesithathu uxhumene nowesibili, kodwa uthinta ukwehluleka kwezikhulu zezinyunyana ukusukumela amalungelo ezisebenzi. Lokhu kwagcina ngokubheduka kodlame ezimayini ezisondelene nendawo yaseMarikana, lapho amaphoyisa adubula, abulala izisebenzi zasemayini ye-platinum ngo-August 2012.
Umsuka wokugcina uthinta abaqashi abavame ukwehluleka ukugcina izithembiso zabo zokuthuthukisa izindawo lapho kuhlala khona izisebenzi kanye nemiphakathi eyakhelene nemayini. Umthetho osingethe ezokumbiwa phansi kuleli ubeka ukuthi abanikazi bezimayini kumele bathuthukise izindawo ezisondelene nezimayini zabo.
Uma sekuhlanganisiwe konke lokhu, yikho okudala ukuthi izamba zomvuzo wabaphathi bezinkampani zivuse uhlevane ezisebenzini kanye namanye amalungu emiphakathi. Bonke bekhononda ngegebe elikhulu phakathi kwemiholo yezisebenzi kanye nabaphathi bezinkampani.
Ingxenye enkulu yesamba esitholwe uMnu Froneman, amasheya awethenjiswa yile nkampani ngonyaka ka-2018. Lolu hlobo lomvuzo lusebenza ngokuthi ibhodi yenkampani ibekele umphathi omkhulu wenkampani izikalo ezithile mayelana nenzuzo okumele yenziwe yinkampani ngesikhathi esithile, okuvame ukuthi kube yiminyaka emithathu kuya kwemihlanu.
Uma inzuzo eyenziwe yinkampani ngaleso sikhathi esinqunyiwe ifikile noma yedlula izinga ebelibekiwe, abaphathi benkampani bayahlonyuliswa ngamasheya okwakuvunyelwane ngawo. Yilolu hlobo lomvuzo olwenyuse umholo kaMnu Froneman, wedlula izigidi ezingakhulu amathathu amarandi.
Okunye wukuthi, uMnu Froneman uholelwa ingxenye yenkampani ezinze kuleli kanye nezinze eMelika. Umholo wakhe waseMelika ungamadola, okuyimali yaseMelika.
Ikhishwa nje le mininingwane, sekuphele izinyanga ezintathu izisebenzi zemayini yegolide zakwaSibanyeStillwater kuleli zitelekile, ngoba zingavumelani nokwenyuswa kwemiholo okuhlongozwa umqashi. Umqashi uhlongoza ukwenyusa imiholo ngoR850 ngenyanga, kanti izisebenzi zithi azinakwemukela ukukhushulwa kwemiholo okungaphansi kuka-R1000 ngenyanga.
Okhulumela umqashi uthi okufunwa yizisebenzi kuzonciphisa kakhulu inzuzo eyenziwa yile nkampani ngokuthengisa umkhiqizo wayo wegolide. Kuzokhumbuleka ukuthi izimayini zegolide azizinqumeli intengo yegolide, kodwa ibekwa yizimakethe ezibhekene nokuthengiswa kwegolide. Le ntengo iba yinani lemali yaseMelika, amadola. Izimayini zakuleli ziyayishintsha imali yaseMelika ibe ngamarandi akuleli.
Ukungqubuzana kugcine sekuchithekele emkhosini wokugubha usuku lwezisebenzi ngeSonto eledlule. Lo mkhosi ubuthanyelwe nguMengameli wezwe, uMnu Cyril Ramaphosa, ogcine engasakwazanga ukwethula inkulumo yakhe, waphoqeka ukuthi ashiye umcimbi.
Ephawula ngalokho encwadini yakhe ayibhalela isizwe njalo ekuqaleni kwesonto, uMengameli uthe akakwazanga ukwethula inkulumo yakhe kulomcimbi obuseRustenburg, esifundazweni iNorth-West, ngoba iqembu lezisebenzi belinezikhalazo elizibeke obala.
“Ingathi isikhalazo esikhulu siphathelene nezingxoxo ngokwenyuswa kwemiholo yezisebenzi ezimayini eziseduze nale ndawo. Kodwa izenzo zezisebenzi zikhomba ukuthi ziningi ezinye izikhalazo ezikhona.
“Konke lokhu kuyinkomba yokwehla kwezinga lethemba izisebenzi ezinalo ezinyunyaneni ezizimele kanye nabaholi bezepolitiki.”
Wethembise ukuthi uhulumeni uzothatha izinyathelo ezifanele zokufukula izinga lempilo yezisebenzi kanye nesimo somsebenzi. Kodwa uthe lokhu akukho nje emahlombe kahulumeni kuphela. Abezinyunyana nosozimboni baneqhaza elikhulu, elidinga ukuthi babambisane nohulumeni ukuthuthukisa umnotho wezwe.
Nokho umlando wezwe, ikakhulukazi kule minyaka engaphezulu kweshumi eyedlule, awuthembisi. Sekukaningi uhulumeni uthembisa ukubhekana nezinkinga zezisebenzi, kodwa izithelo zalokhu azibonakali.