Mawuqaphele eyokuthi indlala ibanga ulaka
NGOKUBONA kongoti bezempilo, kakusensuku zatshwala ukuba isivuvu sesihlanu sokhuvethe sihlasele ngamandla eNingizimu Afrika njengoba ziya ngokukhula izibalo zabantu abaguliswa yilo mkhuhlane. EChina, okuyizwe lapho lo mkhuhlane, obizwa ngeleCovid-19, waqala khona ekupheleni kuka-2019, sekuvalwe thaqa amanye amadolobha amakhulu akhona, izigidi zabantu zavalelwa ezindlini, ngoba uhulumeni wakhona uzama ukunqanda ukubhebhetheka kwalo mkhuhlane.
Uhulumeni wakuleliya zwe elibuswa ngamaKhomanisi, uyakwazi ukuvalela abantu ezindlini zabo kungabi ndaba zalutho, ngoba uyasatshwa, kawuphikiswa, futhi kawunandaba namalungelo oluntu. Umuntu okhonondayo, ugqunywa ejele.
Ukusabalala kokutheleleka kwabantu yigciwane kuleli, sekuqubule imibuzo kwabanye yokuthi, kungenzeka yini uhulumeni uqinise imithetho yomvalelandlini efuze leyo ayibeka ngesikhathi isifo sigadla okokuqala eminyakeni emibili eyedlule, ukuzama ukuvimba ukubhebhetheka kwalo mkhuhlane?
Okudala le micabango wukwesaba ukuthi umkhuhlane ungase ubhebhetheke ngesivinini njengoba kungena ubusika nje, futhi ingxenye yabantu ingakagomi ukuzama ukuzivikela emkhuhlaneni, njengoba abaningi bengayingeni eyokujova, bethi “seluphelile ukhuvethe”.
Sekuwumlando manje ukuthi mkhulu kangakanani umonakalo owadalwa wukuvalwa kwezwe okokuqala ngoNdasa (March) wango-2020, njengoba izinkampani eziningi zaqumbeka phansi, abantu ababalelwa ku-2 million balahlekelwa yimisebenzi.
Imiphumela yaleso sinqumo sokuvala izwe thaqa isabonakala nanamhlanje njengoba umnotho wezwe, owawuvele ubuthaka, ungakasimami. Uhulumeni wabuye wenza isimo saba sibi kakhulu ngokuvala ukudayiswa kwezimpahla ezithile ezitolo, okubalwa izikhindi, izicathulo ezivulekile, amahembe anemikhono emifushane, inyama yenkukhu ephekiwe, ugwayi, utshwala, nokunye.
Nanamuhla abanye bethu basazibuza ukuthi kungani lezi zinto esezibaliwe zavalwa ukuthengiswa ezitolo. Umphumela walesi sinyathelo kwaba wukulimaza umnotho, izinkulungwane zaphelelwa yimisebenzi. Kungaba kuhle uma uhulumeni kukhona owakufunda ngokushaya le migomo engenamqondo.
Njengoba isivuvu sesihlanu kuthiwa sesisemome, sinxusa ukuba uhulumeni uqaphele, ungashayi eminye imithetho ezonqinda abantu ukuba bakwazi ukubamba amatoho, bakwazi ukuziphilisa nemindeni yabo.
Imithetho evimba abantu ukukwazi ukuziphilisa idala indlala, yandise amathuba okuba kuqale isibhicongo esifuze umhlola owenzeka ngoNtulikazi (July) nyakenye, KwaZulu-Natal, lapho izinkulungwane zazitapela izimpahla ezitolo nasezinkampanini, kwenzeka umonakalo owesabekayo. Abadala babekhuluma isiminya nxashane bethi indlala ibanga ulaka.