Ungenelwe yizinkunzi umjaho waseThekwini
Kukhona nabaqhamuka eKenya abangabhenywa kwiDurban International Marathon
NGEKE bavunyelwe ukugijima abasubathi abangagomile kwiDurban International Marathon ehlelwe yiPhantane Athletics Club ezokuba ngeSonto isukela eProspecton, eSiphingo, isongwe eMoses Mabhida Stadium, eThekwini.
Lo mjaho uyingxenye ye-Athletics South Africa (ASA) National Marathon Championships kanti uzokube uhambisana ne-10km yona ezosukela eShaka Marine isongwe eMoses Mabhida.
Abasubathi abazokwenza kahle kulo mqhudelwano ozokube usakazwa bukhoma kwiSuperSport TV, bazozibeka ethubeni lokumela iNingizimu Afrika emidlalweni eyahlukene.
Phakathi kwayo okukhona i-African Championships, iWorld Athletics Championships namaCommonwealth Games.
Phambilini uMengameli weASA uJames Moloi watshela abezindaba ukuthi lo mjaho uzobanjelwa kulesi sifundazwe iminyaka emithathu. Kuthiwa kuzokwamukelwa abasubathi abagomile kuphela kanti abanye bangathumela imiphumela eqinisekisa ukuthi kabanalo ukhuvethe.
Kulo mqhudelwano kubhekwe ukuba izifundazwe zithumele okhilimu bazo. Phakathi kwabasubathi ababhekiwe kulo mjaho kukhona uLungile Qongqa oke waba yingqwele yeTwo Oceans Marathon eminyakeni edlule noXoliswa Tyali ongomunye wabasubathi abanomlando kwezokugijima kuleli.
IKwaZulu-Natal izokube igadla ngoJenet Mbhele osanda kujoyina iXcel Running Club. UJenet uzokube ehambisana nozakwabo uZinhle Shabalala ongomunye wabasubathi okubhekwe ukuba angene nabokuqala abalishumi esigabeni sabesifazane.
Omunye umsubathi wesifundazwe obhekiwe ngu-Ann Ashworth obe yingqwele yeComrades Marathon ngo-2018, kanti usanda kungena nabokuqala abalishumi kwiTotalsports Two Oceans yanonyaka enqotshwe nguGerda Steyn.
Izingqwele zalo mjaho zizohlomula ngo-R50 000 kubo bobubili ubulili, kuthi umsubathi wesilisa ogijime ngaphansi kuka-2:13 athole u-R50 000, kuthi owenze ngaphansi kuka-2:35 kwabesifazane azuze u-R50 000 ngaphezulu.
Abadidiyeli balo mjaho bathe kushone usuku lwayizolo ngoLwesithathu sekubhalise abasubathi abangaphezulu kwenkulungwane. Bathi banethemba lokuthi lesi sibalo sizokwenyuka njengoba kuzovulwa kuze kube wuMgqibelo ukubhalisa.
UMdu Khumalo wePhantane AC ekhuluma neLANGA izolo emini, uthe izinombolo ziyenyuka njengoba umjaho sewusondele.
“Nginethemba lokuthi sizokwazi ukuthola abasubathi abangaphezulu kuka-2500 kuya ku-3000. Baningi abasubathi abangakabhalisi, kanti abanye basazothumela imininingwane yabo.
UWinfred Mutiro waseKenya owenza u-2:17 kwiCape Town Marathon uzokube eyingxenye yalo mjaho. Esifundazweni sizokube sigadla ngoBonginkosi Zwane ozovikela isicoco, uSiyabonga Nkonde osefomini enhle, uPhilani Buthelezi ukubala nje abambalwa.”
UMoloi uthe balindele umjaho osezingeni eliphezulu ngeSonto. Ubonge iKwaZulu-Natal Athletics (KZNA) nomasipala weTheku ngokusebenzisana ukuhlela lo mjaho.
Abasafuna ukubhalisa bangaya eKings Park Athletics Stadium kusasa nangoMgqibelo lapho kuzokube kuthathwa khona izinombolo.