UJessica uthembisa ukuthuthukisa ibhola labesifazane
UTHEMBISA ukusebenza kanzima ukuthuthukisa unobhutshuzwayo wabesifazane e-Afrika uJessica Motaung (osesithombeni), oqokelwe ekomidini elimqoka leConfederation of African Football (CAF), iWomen Football Standing Committee kusukela kulo nyaka ka-2022 kuya ku-2024.
Ukuqokelwa kukaJessica kuleli komidi, kuqinisekiswe nguVeron Mosengo-Omba ongunobhala wale nhlangano esingethe unobhutshuzwayo wase-Afrika.
Ukuqokwa kwakhe kuze ngemuva kokuba ehambele iWomen’s Football Taskforce Workshop yeCaf ngo-2019.
Lo mhlangano ubuhanjelwe ngabantu abawu-23 abavela emazweni awu-17 ase-Afrika.
UJessica uthi uzokwenza konke okusemandleni ukuqinisekisa ukuthuthuka kukanobhutshuzwayo wabesifazane e-Afrika.
“Ngibonga kakhulu uSihlalo wethu kwiKaizer Chiefs (uKaizer Motaung) ngale mpumelelo.
"Ubuholi nobuhlakani bakhe bungisize kakhulu ukukhula kulo mdlalo. Ngithanda ukubonga noSihlalo weligi yethu, u-Irvin Khoza okuthe ezwa lezi zindaba wangibongela. Ngibonga kakhulu nomengameli weCaf, uPatrice Motsepe nabo bonke ubuholi beCaf.
"Ngizosebenza kanzima ukuthuthukisa ibhola, ikakhulukazi elabesifazane ngokuqokelwa kuleli komidi,” kusho uJessica.
Lesi sikhundla sizokwenza ukuthi uJessica abe mningi eCario, emahhovisi eCaf, nasemazweni ahlukene ase-Afrika.
ICaf isemkhankasweni wokuthuthukisa ibhola labesifazane.
UKaizer onguyise kaJessica, uthi kusho lukhulu ukunikwa kwendodakazi yakhe lo msebenzi.
Ikomidi aqokelwe kulona uJessica liholwa nguKanizat Ibrahim oyisekela lesihlanu likamengameli weCaf, aphinde ahole ikomidi labesifazane leCaf.
UJessica ulindeleke ukuba abambe elikhulu iqhaza emiqhudelwaneni emqoka yabesifazane ehlelwa yiCaf okubalwa iWomen’s Afcon ezoqala mhla ka-2 kuya ku-23 kuNtulikazi (July) eMorocco.