IDowns ithembisa ingcwenga koweChiefs
UMngqithi uncoma nefomu enhle ka-Andile Jali
UMQEQESHI weMamelodi Sundowns, uManqoba “TV” Mngqithi uncoma u-Andile Jali (osesithombeni) ngempumelelo yale kilabhu esemgqeni wokushanela zonke izicoco ezintathu ezidlalelwa kwiPremier Soccer League (PSL) kule sizini.
IDowns ziyihambela kahle izinto kule sizini njengoba iyivule ngokunqoba iMTN8, yadla iligi ngeledlule kanti isikowamanqamu weNedbank Cup ezowudlala neMarumo Gallants ngomhla ka-28 kuNhlaba (May) eRoyal Bafokeng Sports Palace, eRustenburg, eNorth West.
Nakuba le kilabhu isiyinqobile iligi, kodwa imidlalo isaqhubeka njengoba izogadulisana neKaizer Chiefs koweDStv Premiership ngeSonto ngo-17h30 eFNB Stadium, eGoli.
UMngqithi utshele ILANGA ukuthi ingxenye yempumelelo yale kilabhu kule sizini idalwe nayifomu ebabazekayo kaJali osibamba sithule ngqi isisu sale kilabhu. Uthi yingalesi sizathu benquma ukumbonga ngokumnika ibhande lokuba ngukaputeni kweminye imidlalo yalesi sigaba.
“Empeleni uJali ukudlala kwakhe ngokukhulu ukuzinikela ekilabhini ukuqale ngesizini edlule. Okuhle wukuthi usebenza ngokubambisana okuhle nozakwabo,” kusho uMngqithi.
Uthe ifomu yalo mdlali ingaba wusizo olukhulu nakwiBafana Bafana ezoqala amalungiselelo emidlalo yokuhlungela i-Africa Cup of Nations (Afcon) ezokuba seIvory Coast ngonyaka ozayo.
Ephawula ngomdlalo weChiefs uMngqithi uthe: “Inhloso yethu wukudlala ingcwenga yodwa kulo mdlalo ukuwunika isithunzi esiwufanele. Kumqoka kakhulu ukuba siwunqobe lo mdlalo.
"Nginethemba lokuthi abadlali bazokwazi ukubhekana nengcindezi yalo mdlalo. Nokho senza konke okusemandleni ukubagcina bewulungele kahle.”
Isiyonke imidlalo yeDStv Premiership ehlelelwe ukuba ngempelasonto imi ngalolu hlobo:KUSASA NGOLWESIHLANU ELucas Masterpieces Moripe: SuperSport Utd vs Swallows 19h30.
NGOMGQIBELO ENelson Mandela Bay: Chippa United vs Baroka FC 15h00.
EPeter Mokaba Stadium: Marumo Gallants FC vs Golden Arrows 15h00.
EMoses Mabhida: AmaZulu vs Sekhukhune United 17h00.
EDanie Craven: Stellenbosch vs Maritzburg Utd 17h00.
E-DHL Stadium: Cape Town City FC vs TS Galaxy 19h30.
NGESONTO
EFNB Stadium: Kaizer Chiefs vs Mamelodi Sundowns 17h30.