Ithemba ngesabelomali soMnyango
Sethulwe nguNgqongqoshe Hlengiwe Mavimbela ngokuqala kwesonto
IKHUZA ibuya yonke imidlalo ehlelwa wuMnyango wezeMidlalo KwaZulu-Natal.
Lokhu kuvezwe ngungqongqoshe walo mnyango, uHlengiwe Mavimbela, ngesikhathi ethula isabelomali sika-R1.4 billion somnyango wakhe ngoLwesibili eSishayamthetho saKwaZulu-Natal eMgungundlovu.
Uqinisekise abathandi bezemidlalo ukuthi yonke imidlalo abebeyihlela; okuyiDundee July, iKZN Premier’s Cup, iNational Sport Awards ne-Indigenous Games izokuba khona njengoba izwe selivulekile emuva kokuvalwa ngenxa yokhuvethe.
Ngaphambi kokwethula inkulumo yakhe, uqale ngokudlulisa amazwi enduduzo emndenini kaNobuhle Gumede obeyingxenye yemidlalo yeIndigenous noSenamile Mkhize ongumdlali wethenisi abadlule emhlabeni ngesikhathi sezikhukhula ezidlule nemiphefumulo engaphezulu kuka400 KwaZulu-Natal.
Bagqugquzela ukuvuselelwa kwezemidlalo ezikoleni
Ukubeke kwacaca ukuthi umsebenzi omkhulu womnyango wakhe wukwakha ubumbano emphakathini nokuzama ukuvula amathuba emisebenzi emkhakheni wezemidlalo nakowezobuciko.
Eminye yale midlalo ebaliwe, iphazamisekile ngesikhathi izwe lingena kuthaqa, kubhoke iCovid-19. Ukubuya kwayo kunika ithemba kwabezemidlalo ngoba kunabantu abaphila ngazo.
Kuzokhumbuleka ukuthi ungqongqoshe usanda kumemezela ukuthi uLwesine kuzokuba wusuku lwezemidlalo ezikoleni kuso sonke isifundazwe.
ISchool Sports ihlomule ngoR48.6 million wokuvuselela nokugqugquzela ezemidlalo ezikoleni.
Kule mali, u-R38.9 million uzokuya kwi-mass participation nezibonelelo ezitholwa ngabadlali, kanti u-R9.7 million wona uye kwezinye izinhlelo zokufukula ezemidlalo namasiko.
Kunabafundi besifazane abadlala ibhola abaqokelwe kwelikazwelonke
UMavimbela uthe le mali izosiza ekutheni zonke izinto zezemidlalo ezikoleni zigcinwe zisesimweni esigculisayo nokuqinisekisa ukuthi imidlalo yezikole iyaqhubeka, ikakhulukazi i-championships.
“Kumanje kunabantwana abayisihlanu abaqokelwe eqenjini lesizwe lamantombazane likaU/17 likanobhutshuzwayo.
"Laba bafundi base-Edendale Technical High School u-Aphelele Mhlengi, uNonzuzo
Buthelezi, u-Amahle Sishi, u-Asanda Mchunu no-Olwethu Sishi bebeyingxenye yemidlalo yeCAF U/16 PAN African Football Championships ebiseCongo.
“Badlale kahle balala isibili behlulwa yiMorocco kweyamanqamu.
"Ukwenza kahle kwabo kuholele ekutheni bafakwe ekhempini kazwelonke yeSafa U/17.
“Kakugcinanga lapho ngoba iKZN School Sport Team nayo ingene endaweni yesibili kwiNational Swimming Championships ePretoria. Okuhle wukuthi neqembu lethu ebeliye emidlalweni yeNational Secondary School Athletics Championships, libuye nezindondo eziyisikhombisa ngenyanga edlule eGermiston,” kusho uMavimbela.
I-KZN izosingatha imidlalo yomhlaba yethenisi ngonyaka ozayo
Uthe ngonyaka ozayo iKwaZulu-Natal izosingatha imidlalo yeInternational Table Tennis Federation (ITTF), iWorld Individual Table Tennis Championships ezokuba e-International Convention Centre (ICC). Le midlalo izokuba ngoNhlaba (May) wonyaka ozayo.
Lo mqhudelwano kuthiwa ukhuza ibuya e-Afrika njengoba uke waba khona ngo-1939 usingethwe yi-Egypt.
UMavimbela uthi lo mqhudelwano uzosiza abantu baseNingizimu Afrika ukuba bakwazi ukuvezela abantu bomhlaba isiko labo.
Ngaphandle kwalo mqhudelwano, kuzokuthi ngawo unyaka ozayo iNingizimu Afrika isingathe imidlalo yeNetball World Cup ezokuba seCape Town.
Kuza le midlalo yomhlaba nje, umnyango sewuqalile ukwazisa umphakathi ngawo ngokuthi ugqugquzele ukuthi njalo ngoLwesihlanu kugqokwe izikibha zezemidlalo ukwazisa umphakathi ngawo.
INetball Friday KwaZuluNatal, yethulwe ngokusemthethweni ngenyanga edlule KwaMsane, eMtubatuba.
Umnyango wakha ama-cycling hub ukuvundulula amakhono
Uthe uchazekile wudaba lukaUnathi Nxumalo waseHammarsdale obesebenzisa umdlalo wamabhayisikili ukulwa nezidakamizwa, wathi uthando lwakhe lwebhayisikili luhehe abeKZN Cycling Development Programme, eHammarsdale.
Ikhono likaNxumalo liholele ekutheni nyakenye angene eqenjini lesizwe ebelidlala kwiUnion Cyclists International (UCI) Mountain Bike World Championships ebise-Italy.
Umnyango sewakhe amaCycling Hub ezindaweni eziningi emadolobheni nasemakhaya.