IMEYA NOHLELO LOKUCOBELELA ABAFUNDI NGEMIKHAKHA ENGABAHLOMULISA NGEMISEBENZI KOMASIPALA
IMEYA icacisele abafundi ngamathuba emisebenzi adingwa wumasipala wakwaNongoma, angabeka abafundi emathubeni okuthi basheshe bahlomule ngemisebenzi kulo masipala uma sebethole iziqu zabo.
UMnu Albert Mncwango ubekhuluma emcimbini wokucotshelelwa ngolwazi kwabafundi bezikole zakule ndawo ngoLwesihlanu, eMultipurpose Centre. UMnu Mncwango uthe izikhala zomsebenzi ezingaphendlelwa abafundi bakule ndawo, ezemikhakha ekhethekile. Kule mbizo bekubizwe nabezikhungo zemfundo ephakeme ukuba bazocobelela abafundi ngolwazi ngemikhakha ehlukahlukene.
UMnu Mncwango utshele abafundi ukuthi akulona iphutha ukukhetha kwabafundi imikhakha abayithandayo, kodwa kufanele bacabange kabanzi uma bekhetha izifundo. Uthe phakathi kwemikhakha abayifunayo kumasipala kubalwa iManagement, Bcom Accounting, Supply Chain, Civil Engineer-ing,Town and Regional Planing neminye.
“Kwamasipala sifuna imikhakha ekhethekile. Ngeke enyuvesi ukhethe umkhakha wokutshala izihlahla bese ufuna umsebenzi kwaNongoma ngoba asitshali izihlahla. Uma nifundele le mikhakha esiyifunayo, anisoze nawuswela umsebenzi kumasipala wenu.
“Kunengane yakhona lana endaweni efike kithina iphethe incwadi yokuthi imukeliwe enyuvesi iyokwenza iziqu zePlanning kodwa ayinayo imali yokufunda. Asizange singabaze, sayithatha sayinikeza umfundaze okhokhela zonke izindleko zayo. Uma isiqedile sizoyiqasha izosebenza kumasipala iminyaka emithathu.
“Ngakho-ke ngiqonde ukwazise abafundi bakwaNongoma ukuthi ngeke babhekane nenkinga yokufesela umsebenzi uma befundele imikhakha esiyidingayo,” kusho uMnu Mncwango.
Uthi njengoba beqale lo mcimbi wokucotshelelwa kwabafundi ngolwazi, bazimisele ukuwuthuthukisa nokwenza umehluko omkhulu ezimpilweni zabafundi. Uveze nokuthi abafundi bazonikezwa ithuba lokwenza uqeqesho kumasipala uma bephethe imikhakha eyenziwayo ngaphakathi.
“Njengoba siqale lolu chungechunge lokuphekwa kwabafundi, sifuna ushintshe uNongoma kulokho odume ngakho. Isifiso sethu wukuthi le ndawo igqame ngemfundo,” kusho uMnu Mncwango.
Omunye wabafundi ohlomule ngolwazi kule mbizo uMpendulo Masuku, waseMshanelo Wesizwe High School, uthi kuvuleke elinye ikhasi elisha ngenxa yolwazi abalutholile.
“Sifunde okuningi ngokumele sikwenze ukuze sikhethe ngendlela ezokwenza singazisoli,” esho.