Kumqoka ukuqasha abahlela imfundo
ISIMO semfundo selokhu sakhululeka, siyangihlupha. Bengilokhu ngithinta izingcithabuchopho kwezemfundo. Sengixoxa noSolwazi uVika Gabela owayefundisa eNyuvesi yaKwaZulu, ngeminyaka yama 80s, owagcina eyiDean kwiFaculty of Education phakathi kuka2002-2006 ubuyela emuva ukuthi kusukwaphi:
“Imfundo wumsebenzi odule kunayo yonke kuhulumeni. Iyinto engasetshenziswa njengokusondeza umuntu emathubeni amahle, iwumthombo wokusizakala unomphelo, inikeze ulwazi namakhono okuzilethela inzuzo nempilo engcono, ivelele njengento okumele itholwe yinanoma yisiphi isakhamuzi, ngokuba ligugu lekhethelo ozitholele lona angeke alephucwe muntu.
Kungabe imfundo etholwa yizingane zethu nabazukulu iyikho ngokugcwele?
Okumele sikuqonde umdlandla, uxhaso nokuvuleka kwamathuba emfundo emazingeni ehlukene ongakubiza ngokukhula ngezibalo kwezemfundo. Izikole zigcwele ziyachichima. Emanyuvesi uchibidolo lwabafundi. Banamajazi, amanye baze bewaphindephinde. Ihamba ifikephi indaba ongayibiza ngokulungisa imfundo enohlonze njengamanje?
Eminyakeni engamashumi amane ngama-80s, ukuthola iziqu zeBA kuthisha osensimini kwakuyinoni lekhethelo. Izikhungo zemfundo zavula amakilasi asebusuku, kwagcwala othisha, bexebula iziqu. Abano PTC noJSTC batshelwa ukuthi kabafundile, bazophelelwa wumhlaba. Akukho sivivinyo sikathisha onale mfundo esamthola exega.
Kusukela ngo-1955 sasifunda ngesiZulu iminyaka eyisishiyagalombili kwi ‘Bantu education’. Emapulazini esazalelwa kuwo kwakunothisha oyedwa owayefundisa ebangeni lokuqala kuya kwelesine, nothisha ababili ababefundisa kusukela kuGrade 1 kuya ku-7. Iziqu zebanga lesi 5 (grade 7) ngazithola, Emacityane, eyasungulwa yithishelakazi lomXhosa.
Emakhaya sasifundiswa ngothisha abano-T4, LPTC, owayephase ibanga lesi-6 neminyaka emithathu noT3 Junior, HPTC ofunde ibanga lesi-8 neminyaka emibili yokufundela ubuthishela. Asizange sibone mjiva wejazi lezemfundo kuthisha ngaleyo minyaka.
Sasizwa ngendaba ukuthi kuno-T3 Senior, nowayebizwa ngoPost-Matric. UT3 Senior waphela ngo-1955, uhulumeni wamabhunu esethi ama-private schools kawehlukane nokuqeqesha othisha, kungenjalo ngeke baqashwe.
Ngo-1968 kwasungulwa uJSTC emakolishi. UHPTC wahlanganiswa noLPTC kwenziwa isitifiketi esisodwa esasibizwa ngoPTC, kufundwa iminyaka emibili emva kokuphasa ibanga lesi-8 (uForm 111).
Yilezi zifundo uhulumeni wobandlululo athi ngo-1980 zizophoswa emgqonyeni, ngenkathi ethi wonke umuntu onazo akazithuthukise, athole uSTD noma uPTD, okuyiminyaka emithathu emva kukamatekulestsheni. Namuhla kunomuntu one-Honours degree ofundisa u-grade 1. Kunothisha ose-primary onePhD.
Kushoni lokhu? Sezande kakhulu izifundiswa namuhla? Kungabe izinga lemfundo selidlondlobele? Ibanga lesi-5 (grade 7), ofunda ngesiNgisi kungabe usengcono kunaloya owayefunda ngesiZulu, isiNgisi siyimvela kancane?
Ngikhumbula ngo-1960, ngenza uStandard 4-5, sifundiswa wuthisha u-Assa Bhekisisa Buthelezi, owayeno-T3 Junior. Wayewuthishanhloko, abuye abe u-class teacher ka-standard 1 kuya ku-standard 5. Sengihlangana naye eMashona ngo1985, wathi uqhukuluza eMlazi College for Further Education, kuthiwa izitifiketi zabo kazisasho lutho.
Landile inani labaneziqu zasenyuvesi, abaduve emakhaya. Enye yezinkinga emanyuvesi wukukhiqiza iziqu ezingahlelelwe endaweni yemisebenzi. Umfundi angathola iqhuzu alidingayo, okungacaci limusaphi.
Nenyuvesi ingakhiqiza amaqhuzu engenaso isiqiniseko sokuthi adingeka kuphi. Noma imisebenzi ikhona, kungenzeka ingahambisani nolwazi namakhono okuzuzwe ngabafundile, ngokuhlelela ukuqasheka.
Ezikoleni izingane eziningi zizoyaphi uma ziqeda? Uma ziqhubekela phambili, ziyophuma ziyephi? Lukhona uhlelo oluxhumanisa ukufunda nokuziphilisa emuva kwalokho? Kunokudukuza oswini lwenkomo emfundweni yethu.
Abekho abaqashwe ngokugcwele ukuhlela imfundo jikelele. Yishwa ngoba ngaphandle kokuhlela okuyikho, iningi imali echithwa emfundweni engenanzuzo. Isishiya sigodle iziqu ezingasiyisi ndawo.
AmaTVET College anesabelo kuNSFAS. Afundisa izifundo ezahlukene. Wubani ohlela lomkhakha wemfundo? Okufundiswayo kuyingxenye yaluphi uhlelo? Luphethwe wubani? Uma kunesifundo sokwengamela amabhizinisi, uzokwenzani umfundi ngalesi sitifiketi? Siyingxenye yaluphi uhlelo nocwaningo?
Imfundo kakusiyo ekahulumeni, bonke osopolitiki ngabantu betoho leminyaka emihlanu. Yini umsebenzi wenhloko yomnyango? Ngeshwa ulitoho lokuqashwa leminyaka emihlanu.
Uma egodle amandla, abaqashwe ngendlela ehlukile kakukho mehluko abangawenza kodwa wukuhlikihla ibhentshi, izinhloko zingena ziphuma. Ibhajiwe inqola, ezifundazweni nakomkhulu lika-Angie Motshekga. EkaBlade Nzimande siyibeka eceleni ngoba amanyuvesi aziphethe.