IZISEBENZI ZAKWA-SARS ZITHI ZIZOQHUBEKA NESITELEKA
KUPHAZAMISEKE ukusebenza emahhovisi amaningi eSouth African Revenue Services (SARS) ezweni lonke ngenxa yesiteleka sezisebenzi ezifuna ukwenyuselwa amaholo.
Ngokusho kweSARS, kwinqwaba yamahhovisi ayo abevaliwe kusukela izolo ekuseni ngo-9:30 kubalwa iPinetown, Port Elizabeth, Umtata, Bethlehem, Ashlea Gardens, Giyani, Witbank, Nelspruit, Standerton, East London, Boksburg, Upington, Rustenburg, neLebowakgomo. Ithi kuthe emini yantambama ngo-13:30 kwavalwa ihhovisi eliseBeaufort West, nasePaarl.
Isiteleka sezisebenzi eSARS silandela ukungavumelani kwayo nezinyunyana zezisebenzi iNational Education, Health and Allied Workers' Union (NEHAWU), kanye nePublic Servants Association (PSA) of South Africa.
Lezi zisebenzi zakwaSARS zifuna umqashi azenyusele amaholo ngo-12%.
Njengamanje iSARS ibeke etafuleni u-1,3% kanti phambilini ibingazimisele nhlobo ngokwenyusa imali.
Nakuba iSARS isibuyekezile isinqumo sayo sika-0%, yabeka etafuleni u-1,3% kodwa izinyunyana ziyakuchitha lokho.
ISARS ikhala ngokuthi ayinayo imali yokubhekana nalokhu kwenyuswa kwamaholo okufunwa yizisebenzi.
UKhomishana weSARS, uMnu Edward Kieswetter uthe: “Ngiyajabula ukuthi ngaphansi kwezimo ezinzima siyakwazi ukunikeza izisebenzi zethu okuthile.
"Ngiphinde ngikhumbuze izisebenzi zethu ukuthi sinenhlanhla enkulu yokuba nomsebenzi ovikelekile esikhathini lapho abaningi bengasebenzi futhi bengenamali.”
UMnu Lwazi Nkolonzi okhulumela iNehawu kuzwelonke, utshele ILANGA ukuthi bazimisele ngokuqhubeka nesiteleka kuze kube umqashi uvumelana nezimfuno zezisebenzi. Uthe akukho hhovisi le-SARS ebelisebenza izolo.
Sishubile isimo seziteleka zezisebenzi ezweni kanti kulindeleke ukuba kuqubuke ezinye eziningi.
Esinye sazo osekukhulunywe kakhulu ngazo ngesezisebenzi zasemayini yegolide ne-platinum, iSibanye-Stillwater, esesidonse izinyanga ezintathu njengoba siqale ngoNhlolanja (February).
Izisebenzi zale nkampani ezingamalungu e-Association of Mineworkers and Construction Union (AMCU) kanye neNational Union of Mineworkers (NUM), zafuna ukwenyuselwa amaholo ngo-R1000, kanye nomhlomulo owu-R100 ngaphezulu, obizwa ngokuthi yi-living out allowance.
Kuzokhumbuleka ukuthi izisebenzi zale nkampani ezazidiniwe zaxosha uMengameli Cyril Ramaphosa emcimbini wokugubha usuku lwezisebenzi owawuseNorth West, ekuqaleni kwale nyanga, zamtshela ukuthi kumele angenelele, akhulumisane neziphathi mandla kule nkampani.
Njengamanje ziqhinqe ezindlini zombuso i-Union Buildings, ePretoria njengoba zifuna umengameli angenelele.
•Khona manjalo, kuyaqhubeka ukugqubuzana phakathi kukahulumeni nezinyunyana zezisebenzi ezilwela ukuba kwenyuselwe izisebenzi zikahulumeni amaholo. Zifuna ukuba uhulumeni unyuse amaholo ngo-10% kodwa uhulumeni ugcine ubeke etafuleni okungaphansi kuka-1.5% kanye nomhlomulo owukheshi ka-R1000.
Ngiyajabula ukuthi ngaphansi kwezimo ezinzima siyakwazi ukunikeza izisebenzi zethu okuthile...