LIBUYELA ENKANTOLO ELIKASENZO MEYIWA
LIBUYELA enkantolo ngoMsombuluko icala labalisa abayisihlanu abasolwa ngokubulala uSenzo Meyiwa owayengunozinto we-Orlando Pirates neBafana Bafana.
Kulindeleke ukuba kuqhubeke ukuphonswa kwemibuzo kukafakazi wokuqala uSergeant (Sgt.) Thabo Mosia, wophiko lwamaphoyisa oluqondene nokuqoqwa kobufakazi endaweni yesigameko.
Ngomhla ka-28 kuMbasa (April), ukuqhubeka kokuqulwa kwecala kwahlehliselwa uMsombuluko ziwu-30 kwephezulu, kanti uSgt Mosia owayesebhokisini wayephonswa imibuzo ngummeli wabasolwa abane, u-Advocate (Adv.) Malesela Teffo.
NgoMsombuluko uzoqhubeka u-Adv Teffo ukumphonsa imibuzo uSgt Mosia eNkantolo eNkulu ePretoria, phambi kweJaji uTshifhiwa Maumela.
Kulindeleke ukuba uma sekuqhubeka ukulalelwa kwecala, izithombe ezathwetshulwa endaweni yesigameko eVosloorus, endlini yakubo kaKelly Khumalo ongumculi odumile owayethandana noMeyiwa, eziwubufakazi, zivezwe zibonwe wumphakathi.
Ekuqaleni lezi zithombe bezingavezelwa umphakathi, kodwa ummeli u-Adv Zandile Mshololo, omele umsolwa wesihlanu, wanxusa ukuba zikhonjiswe ukuze kubonakale ukuthi kukhulunywa ngani ngesikhathi esephonsa imibuzo ufakazi. Ukuqulwa kwecala kulindeleke ukuba kudonse kuze kube wumhla ka-15 kuNhlangulana (June). U-Adv Teffo, umele abasolwa kusuka kowokuqala kuya kowesine oku-nguMnu Muzikawukhulelwa Sibiya, Mnu Bongani
Ntanzi, Mnu Mthobisi Mncube, noMnu Mthokoziseni Maphisa, bonke abawaphikayo amacala ababekwe wona.
U-Adv Mshololo yena umele uMnu Fisokuhle Ntuli ongumsolwa wesihlanu.
Kuzokhumbuleka ukuthi ngosuku okwahlehla ngalo icala labasolwa kwelokubulawa kukaMeyiwa, kwaboshwa u-Adv Teffo, okumanje ungaphandle ngebheyili ka-R10 000.
Kulindeleke ukuba abuyele enkantolo kusasa ngoLwesihlanu eNkantolo yeMantshi eHillbrow, eGoli njengoba ebhekene necala lokwedelela inkantolo ngokungalubhadi enkantolo ngosuku okwakumele avele ngalo mayelana necala analo lokungena endaweni angavumelekile ukungena kuyo.