BAKHALELA AMATHAMBO EZISEBENZI ZIKAMASIPALA EZIMUKE NOMFULA
AWUSABUTHI quthu ubuthongo umndeni wakwaShandu, eNtaphuka, oGunjini, eNdwedwe kulandela ukuminza kukababa wekhaya uMnu Solomon Shandu (52), nozakwabo uMnu Simphiwe Cele, abebeyizisebenzi zikamaMasipala weTheku, ngoMgqibelo, ngesikhathi liyidliva, behamba ngemoto yomsebenzi.
UMnu Shandu noMnu Cele, kuthiwa bamuke nemoto kulo mfula bephuma emngcwabeni kazakwabo eHarrismith. Ngokusho kukanina wezingane zikaMnu Shandu, uNkz Phindile Shezi, uthi ngesikhathi behamba ekuseni bawela kulona leli bhuloho ebelisanda kulungiswa ngezandla wumphakathi emuva kokuba labhidlika ngezimvula zokuqala.
“Kuthe uma sebebuya imoto ishayelwa nguzakwabo, wangena kulona emuva kokuba bebone imoto ebebeyilandela ingenile yawela kahle, kanti le yabo kayisezuphumela ngaphesheya. Simfonela ucingo belungangeni. Sitshelwe ngabantu ukuthi kunemoto kamasipala emukile.
“NgoMsombuluko kufike ibhanoyi nethimba labatshuzi, babheka kodwa basheshe baphuma ngoba bethi amanzi adungekile. NgoLwesibili amalungu omphakathi nawo abebheka agcine ekwazile ukuyikhipha imoto kwathi ngaphakathi emotweni, sathola ijazi ubaba ayeligqokile newashi. Siwumndeni sesikhalela ukuthola amathambo abo sikwazi ukubafihla ngesizotha,” kusho uNkz Shezi.
UNkz Shezi uthi ngaphambi kokuba uMnu Shandu ahambe emzini wakhe wayecobekile, ngoba waqala wabatshela ukuthi akahambi kwathi ngemuva kwesikhathi sebezitshelile ukuthi akahambi wathi aba-ayine usezozidonsa ahambe.
“Lo mfula abamuke kuwo yize unqamulela kodwa besingajwayele ukuhamba ngawo njengoba ibhuloho labhidlika, bese sihamba ngoMsunduzi. Angazi bese kutheni bazohamba la ekubeni bazi ukuthi ibhuloho liyabheda futhi bengasaboni nalapho benyathela khona ngoba amanzi abengcolile, lina,” kusho uNkz Shezi.
Inyunyana yezisebenzi zikamasipala iSouth African Municipal
Workers' Union (Samwu)isikhiphe isitatimende inxusa umasipala ukuba ungenelele, kutholakale izidumbu zezisebenzi zawo ezimukile.
Uphinde ulekelele nasekutholeni izidumbu zalaba abanye abangakatholakali.
Ngokwezibalo babalelwa ku-63 abantu abangakatholakali kwaba-ngu-443, abantu abafa ngesikhathi kuhlasele izikhukhula kwaZulu-Natal ngenyanga edlule.
Okhulumela uMasipala weTheku uMnu Msawakhe Mayisela, esitatimendeni asikhiphele imithombo yabezindaba, uthi iMeya uMnu Mxolisi Kaunda, izwakalise ubuhlungu ngokumuka kwalezi zisebenzi, yathembisa umndeni ukuthi ithimba labo lophiko lwakwaSearch and Rescue, ngeke liyeke ukubheka zingakatholakali lezi zisebenzi zabo.