KUQHUME ISILILO INKABI ICHAZA NGOKUBULAWA KUKANJINIYELA
UKUVELA kwesihluku okwabulawa ngaso umfowabo, kumenze wahluleka nokuzibamba, wasidinda phakathi enkantolo udadewabo kanjiniyela owabulawa ngo2020, ngesikhathi inkabi ichaza ngokwenzeka ibulala uMnu Nkosi Langa.
UNkz Zodwa Langa, ongudadewabo kanjiniyela owathathwa emzini wakhe ehleli nengoduso yakhe engumsolwa, utshele ILANGA ukuthi ubeqala ukuzwa imininingwane mayelana nokuthi wabulawa kanjani umfowabo.
Ingoduso kamufi uNkz Nompumelelo Patricia Goncalves, nomfowabo uNkosinathi Zungu, babhekene necala lokubulala uMnu Langa.
Inkabi uJames Mashudu “Ramaphosa” Mthimkhulu, ngoLwesibili ibichaza ngokwenzeka ngesikhathi bebulala umufi. UNkz Langa uhlulekile ukuzibamba, wakhala kanye nezihlobo ebezikhona enkantolo ngesikhathi kuqhubeka ukwethulwa kobufakazi.
Uthi ukuboshwa kwengoduso kamfowabo akuzange kubathuse kakhulu ngoba ubudlelwano babo babungebuhle, bephila ngokuxabana njalo.
“Ngesikhathi eboshwa uNompumelelo, kwasithokozisa ngoba ubulungiswa buzokwenziwa. Saphatheka kabi esededelwa ngebheyili kangangoba umama wagula ephethwe wukhwantalala, nengicabanga ukuthi ukudedelwa kwakhe kwaba nomthelela.
“Umama uze washona ngoMasingana (January)
2021 ekubeni yena wayededelwe ngebheyili ngoZibandlela (December). Kubuhlungu ukuzwa indlela abulawa ngayo umfowethu obekunguyena yedwa ekhaya. Akusithusanga kakhulu ukuboshwa kukaNkz Goncalves ngoba indlela ubudlelwano babo obebuyiyona, bebehlala ngokuxabana.
“Umsolwa wokuqala siyamazi yize besingamjwayele, kodwa besazi ukuthi ungusibali kamfowethu. Ngiyafisa ukuthi badilikelwe yijele ngesenzo sabo esimbi abasenza,” kusho yena.