BAFUNA KUHLELELWE IGCIWANE I-MONKEYPOX LINGAKAFIKI
INHLANGANO ephikisayo i-IFP, ithi uNgqongqoshwe wezeMpilo KwaZulu-Natal, uNkk Nomagugu SimelaneZulu, kufanele ngabe usephumela obala ngezinhlelo zalo mnyango ukuthi uzokwenza njani ukugwema ukusabalala kwegciwane elisha elibizwa ngeMonkeypox.
Ithi kufanele ngabe sezikhona izinhlelo zokuthi uma lesi sifo sigcina sifika kuleli, sizovinjwa kanjani ukuthi singagcini sihlasela kulesi sifundazwe.
Ithi ungqongqoshe akakwazi ukuhlala nje, athule, ngoba nakhu lesi sifo sisabikwa ukuthi simandla kwamanye amazwe angaphandle, kodwa kunalokho umnyango wakhe kufanele ngabe umatasa, wenza izindlela zokusinqanda ukuthi singafiki nhlobo.
“Kakufanele lesi sifo sifike bese kuba sengathi besingazi ukuthi sikhona, kodwa kubalulekile ukuthi sibe nezindlela zokusinqanda,” kusho le nhlangano esitatimendeni.
Ngokusho kwe-World Health Organition (WHO), leli yigciwane elenzeka ezindaweni eziseduze namanzi namahlathi, okumanje selikhona emazweni asentshonalanga.
“Leli gciwane likwazi ukungena kubantu, bona belithathe ngokuthelelwa yizilwane ezahlukene kodwa futhi nomuntu uyakwazi ukuthelela omunye ngalo,” kusho iWHO.
Ithi ukuthelelana phakathi kwabantu kwenzeka ngokuthi lowo osenaleli gciwane elidala izilonda notwayi, abe esethintana nomunye ongenalo noma kube noketshezi oluphuma ngesikhathi ekhuluma.
Lolu ketshezi kuthiwa luyahlala nasezingutsheni zokulala.
Abantu bangathelelana ngokuya ocansini noma ngokuthintana kwezikhumba uma kukhona onalo.
Le nhlangano ithi kubalulekile ukuthi abantu baseNingizimu Afrika yonkana babe befundiswa futhi bexwayiswa ngaleli gciwane nokuthi uma selikungenile, yimiphi imithi engakusiza.