INEHAWU ILULE ISANDLA EZIKOLENI ZASEMSUNDUZI
IGUQULE indlela eyaziwa ngayo i-National Education, Health and Allied Workers Union (Nehawu), eHarry Gwala Region, yokuxazulula ukungaboni ngaso linye phakathi komqashi nezisebenzi.
Abaholi bayo baphume umkhankaso wokuhambela izikole ezingaphansi kwalesi sifunda, beyonikela ngomfaniswano kubafundi abaswele, njengendlela yokugcina inhlalakahle emphakathini.
NgoMsombuluko nangoLwesibili abaholi beNehawu kulesi siyingi bebeseSilwanetshe Primary, eWillowfountain, naseKuhlekonke High, e-Elandskop, eMgungundlovu, beyonikela ngomfaniswano kubafundi abangaphezu kwabawu-10, abebehlonzwe ngothisha babo njengabaswele.
Ekhuluma neLANGA uMnu Mzwi Ngubane unobhala weNehawu, eHarry Gwala Region, uthe sebekwenzile okokulwela amalungelo ezisebenzi, manje sekuyisikhathi sokubheka izingane ezikoleni ukuthi zembethe ngendlela.
Uthe isifunda sabo sakhiwe yizifunda eziwu-6, bazozihambela zonke izikole abazihlonzile, bayonikela.
"SiyiNehawu kasigcini ngokubuka la eduze kwethu njengoba saziwa ngokulwela izisebenzi, kulokhu sijikise amehlo sawabhekisa ezikoleni esizihlonzile, sabheka ukuthi singelula kanjani isandla kubafundi.
"Siyakuqonda ukuthi kunabazali ababhekana nobunzima ekuthengeleni izingane zabo umfaniswano wesikole. "Sibone kukuhle ukuba sibalekelele ukuze nezingane zingazenyezi, zizibone zihlukile phakathi kwezinye esikoleni ngokungaphelelisi umfaniswano wesikole," esho.
UMnu Ngubane uthe uyajabula ukuthi kulezi zikole abazihambele eMgungundlovu, kuvele ukuthi izingane ebezinikelwa ngomfaniswano yilezo ezasala zingenamakhaya emuva kokuguguleka kwamakhaya azo ngoNhlolanja (February) emvuleni eyashiya kukhalwa ezingxenyeni zaseMsunduzi.
UMnu Zazi Nxele okhulumela ihhovisi lemeya yaseMsunduzi, uMnu Mzikhulu Thebolla, uthe besehhovisini lemeya bakushayela ihlombe okwenziwe yiNehawu ezikoleni eziseMsunduzi kokubheka inhlalakahke yomphakathi.