ABAMATEKISI BABUYISELA EMPHAKATHINI NGOKUNIKELELA ABAFUNDI NGEMIFANISWANO
BABUYISELA emphakathini osomatekisi baseMpendle abangaphansi kukasoseshini Impendle Tax Transport Owners Association, njengoba benikelele abafundi bezikole eziwu-7, ngomfaniswano wesikole.
Laba bafundi abawu-60 ngabezikole ezahlukene okubalwa iNhlabamkhosi Primary, iNguga Primary, iRidge Primary, iNogasela Primary, iWozobona Primary noMkhomazana Primary.
Balandwe ngamatekisi mahhala ezikoleni zabo, bephelezelwa ngothisha babo nesigungu esilawula isikole. Bebemukeliswa lo mfaniswano emcimbini obusehholo laseMpendle izolo ngoLwesithathu.
Ekhuluma naleli phephandaba umxhumanisi kasoseshini nomphakathi, uMnu Xolani Mhlophe, uthi okubenze babuyisela emphakathini, wukuthi eminye imindeni isimo ephila ngaphansi kwaso asisihle, kodwa bayabaxhasa ngokugibela amatekisi abo.
“Uma sesithi mabahlanganise imali ize ngezihlalo, abanye balabo bantu basuke benze izikweletu ukuze bakhokhele thina. Namhlanje sithi kulabo bazali abangenalutho, masifake isandla ekusaseni lezingane zabo.
"Ngokujwayelekile izingane zalabo abaxakekile kuba yizo ezenza kahle ezikoleni, zidlule ezabangaswele ngoba zona zisuke zazi ukuthi emindenini yazo kuthenjelwe kuzona ukuze kushintshe impilo,” kusho uMnu Mhlophe.
Uthi lokhu bakwenze nabo besashayekile ngoba ukhuvethe lubashaye kakhulu beyimboni yamatekisi.
Kulo mcimbi bekukhona neziphathimandla ezivela emnyangweni wezemfundo okubalwa inhloko yomqondisi eMnyangweni wezeMfundo KwaZulu-Natal, uMnu Thami Mbanjwa, ehambisana nezinye izikhulu zomnyango okubalwa uMnu Sibusiso Mpethwana, nezikhulu zomnyango wezokuthutha uMnu Mandla Madleka.
Ikhansela laseMpendle uMnu Wonder Dlamini, lithi bewumphakathi basijabulele lesi sipho esikhishwe ngabamatekisi ukusiza abazali.
“Umphakathi ukhungethwe kakhulu ububha nendlala. Lo mfaniswano uzobasiza kakhulu abazali abaningi njengoba abanye babo befundisa izingane ngemali yempesheni,” kusho uMnu Dlamini.