Kumele wenze kube lula ukuthi amabhizinisi atshale imali aphinde aqashe abantu
ENYE yezinkinga engihlangabezana nazo uma ngixoxa nabalingani kuhulumeni, izinyunyana nezinhlangano ezingayenzi inzuzo, yindlela ababuka ngayo abamabhizinisi - njengenhlangano eyodwa abangaxoxisana nayo.
Ngiyakuqonda okwenza lokhu sijwayele ukucabanga ukuthi “izinyunyana” kanjalo “nabamabhizinisi” bayasebenzisana emiphakathini yethu.
Lokho kusenza sicabange ukuthi singaxoxisana nabo ukushintsha indlela abenza ngayo.
Uma kukhulunywa ngamabhizinisi, lokhu kakulona iqiniso. Sonke sisebhizinisini ngoba sihwebelana ngesikhathi noma ngempahla yethu nabanye.
Ngesinye isikhathi siyazihlanganisa sibe yizinkampani ukuze senze lokho. Kunezinkulungwane zezinkampani, iningi lazo ziyaqhudelana zizodwa.
Zinezinjongo eziningi ezihlukahlukene - ezinye zinabanikazi bazo kuphela, ezinye zingabaqashi abakhulu, ezinye zisafufusa, ezinye yizikhondlakhondla ezisebenzela emazweni ahlukene.
Kwesinye isikhathi amanye ala mabhizinisi ayazihlela, abe yizinhlangano ezikwazi ukuwamela ezinkundleni ezithile.
IBusiness Leadership South Africa (iBLSA), ingenye yalezo zinhlangano - amalungu ethu ayasebenzisana ukuxoxisana nabanye ukuthi ingathuthukiswa kanjani indawo okusetshenzelwa kuyona ukuze umnotho uthele izithelo ezizohlomulisa izwe.
Amalungu ethu asayina inkontileka neNingizimu Afrika, ukwandisa amathuba okuphumelela kubona bonke abantu. Amalungu ethu ayingxenye enkulu yomnotho, aqasha izigidi zabantu.
Nakuba sihambisana ngesifisa ukukubona ezweni, kodwa kasiyona inhlangano eyodwa engabizwa ngokuthi “ibhizinisi”. Kayikho into enjalo.
Lokhu kubalulekile ngoba kunombono othi, amabhizinisi “mawasondele”, adele okuthile ukuze kufezeke injongo yenqubomgomo ethile, njengokutshalwa kwemali noma ukwandisa abantu ababaqashile.
Le ndlela yokucabanga kayihlangani – “abamabhizinisi” ngeke bazibophezele kulezi zinjongo. Inkampani ngayodwa engasayina isivumelwano esinjalo.
Uhulumeni ungasayina futhi uyasayina izivumelwano nezinkampani ngaso sonke isikhathi ukuze wenzelwe umsebenzi othile noma uthole izimpahla ezithile.
Ngeke uthembele ekutheni uzongena esivumelwaneni esikanjena nawo wonke amabhizinisi ngendlela efanayo - kayikho into enjalo.
Yingakho ababhekene nenqubomgomo kufanele bagxile ekubhekeni ukuthi imigomo yabo inamthelela muni endleleni okusebenzeka ngayo. Yiyona ndlela othola ngayo into oyifunayo kwabamabhizinisi.
Ucwaningo lwezomnotho luyakuveza ukuthi imithetho enhlobonhlobo inamiphi imiphumela. Uma ufuna abamabhizinisi bakhule, baqashe abanye abantu futhi batshale imali, kumele kube nenzuzo nakubona.
Kakuwona wonke amabhizinisi abheke inzuzo, kodwa kalikho ibhizinisi elingalokhu limile kodwa libe lilahlekelwa yimali. Akekho umuntu osebhizinisini noma ongaphandle kwalo ongafaka imali yakhe engozini ngaphandle kwesizathu esiqinile sokuthi uzothola inzuzo.
Uhulumeni kumele uhlale uzibuza ukuthi le ndawo ibukeka kanjani kosomabhizinisi abacabanga ukufaka imali yabo engozini?
Yiziphi izinto ezenza usomabhizinisi angabi naso isiqiniseko sokuthi lena yindawo angakwazi ukufaka imali yakhe engozini ngayo?
Ngabe izindleko zokusebenza, njengokuthola izimpahla, ukufinyelela emachwebeni, ukuthola i-internet zinomthelela onjani ekwenzeni kwabo inzuzo?
Izindleko zokuqasha abantu zinamthelela muni ekufuneni kwabo ukuqasha abantu? Hhayi izindleko ngemiholo kuphela, kodwa nezindleko ezifana nentela, imidanti yomNyango weziSebenzi neminye imicikilisho.
Izimpendulo zale mibuzo zingawusiza uhulumeni ubone okungenziwa ukuze uthole okufunayo.
Kube khona eminye imisebenzi esezingeni elifanele nokukhula komnotho okusheshayo okwehlisa nobubha, kumele uhulumeni wenze kube lula ukuthi amabhizinisi atshale imali aphinde aqashe abantu.
Kumele wenze ucwaningo ukuze uqonde umthelela wezinqumo zenqubomgomo ezihlukahlukene, ulalele uphinde ufunde kulabo abasekhaleni lwalokhu.
I-BLSA izibophezele ekwesekeni uhulumeni. Singasebenzisa imibono yamalungu ethu njengabatshali nabaqashi abakhulu ukuze sisize abanye ababambe iqhaza baqonde ukuthi le mibandela ibathinta kanjani.
Sisebenza nangezinhlelo ezihlukahlukene ezinjengeBusiness Against Crime neTamdev, ukuze seseke umphakathi ngezinsizakusebenza zethu.
Ngiyazi ukuthi sinobudlelwano obuhle nabaningi abakuhulumeni futhi sinezinjongo ezifanayo ngesifuna ukukubona kwenzeka ezweni lethu.
Ukuze kwenzeke lokhu esikufisayo, kumele sigxile kokubalulekile; indawo abamabhizinisi abasebenzela kuyona esiyakhayo.
Ngokwe-SMME Quarterly Update ye-Small Enterprise Development Agency, amabhizinisi asafufusa aqashe abantu abawu-9,8 million ngoMasingana (January) kuya kuNdasa (March) wango2021.
Lowo wu-64% wabo abaqashiwe emnothweni. Yingakho le mboni yaziwa njengenjini yokwakhiwa kwamathuba omsebenzi. Lo mbiko uveze ukuthi kunamabhizinisi asafufusa awu-2,33 million
eNingizimu Afrika. Awucabange nje ukuba wonke ayakwazi ukuqasha omunye umuntu oyedwa kungaba khona imisebenzi ewu1,3 million.
I-Mining Indaba icacise into eyodwa: UNgqongqoshe wezokuMbiwa Phansi naMandla, uMnu uGwede Mantashe, unohlu lwezinto okumele azenze ngokushesha.
Kumele silungise ukungaqondakali kweminye imithetho okukade kwaba khona nezinto ezivimbile.
NgokweMinerals Council, kunezimvume zezimayini eziwu-4 500 ezingakhishiwe.
Uma izimayini zingakwazi ukuhlola zibheke okumbiwa phansi, ziwumkhakha oshonelwa yilanga futhi ozogcina ungasasele nalutho, okuzobhebhezela ukwentuleka kwemisebenzi nesimo esibi emnothweni.
UNkz Mavuso uyisikhulu esiphezulu seBLSA.