UBUHOLI BUKAMASIPALA WETHEKU MABUSUKUMELE IMIGWAQO
MHLELI: Ngiyafisa ukuba abaholi bakaMasipala weTheku (abaholwa nguMnu Mxolisi Kaunda - oyimeya) bayisukumele eyokulungiswa kwemigwaqo engenela kuleli dolobha, ikakhulukazi uM4 lo obheke ngaseMlazi.
Lo mgwaqo sewonakele ngendlela exakile yizigojana ezizogcina zidala izingozi.
Kuba ngcono uma usetshenziswa yilaba vele asebewujwayele, abaziyo ukuthi mubi kakhulu kuziphi izindawo.
Uma ungazazi lezi zigojana, ungagcina sewuphonseka kuzona, uqhunyelwe ngamathayi kumbe ushayise ezinye izimoto ngoba uzama ukuvika ukungena kuzona.
Okubi ngazo wukuthi zikuthelawayeka njengoba lo mgwaqo kuyiwona osebenza kakhulu uma uphuma eThekwini, ubheke eningizimu.
Kalupheli-ke kulo mgwaqo usizi lwabashayeli njengoba noma sewungena kuN2, ubingelelwa yinkinga efanayo.
Ngeke ngethuke uma lobu bubi bomgwaqo obunezelwe nayizimvula ezinamandla zakamuva, bungaficwa ngezehlobo elizayo ngoba abaholi bethu intuthuko bayihambisa ngonyawo lonwabu.
Bamandla ekunyamalaleni ngokushesha kwemali esuke ikhishelwe ukusiza umphakathi njengoba kwenzekile ngesikhathi kubheduka iCovid-19 eNingizimu Afrika ngo-2020.
Siyanxusa ukuba bavukwe wunembeza kulokhu, imali ekhishwe ngenxa yenhlekelele yezikhukhula, isebenze ukulungisa ingqalasizinda nokusiza labo abagugulekelwa yimizi yabo ukubatholela izindawo eziphephile ukwakha kuzona.
Sekujwayelekile ukuzwa abantu bakithi abampisholo bethi kwakungcono le lizwe lisabuswa ngabamhlophe.
Uma bengashintshi ukwenza abanikwe ukuhola leli zwe, eminyakeni engemingaki ezayo, sizolibuyisela kwabamhlophe ngevoti ngoba sengathi impilo isengcono namanje lapho kulawula khona amaqembu asaphethwe yibona (abamhlophe).