UMJAHO WOKULUNGISELELA I-COMRADES MARATHON ONDINI

ULUNDI Striders luhlele iComrades Marathon Charity Training Run ezokuba ngomhla ka-3 kuNtulikazi (July), oNdini.

Lo mjaho ngowokuzilungiselela iComrades Marathon nokusiza ukuthengela abasubathi baseZululand abangaphezulu kuka-20 amateki okugijima.

Kuzogijinywa u-15km, u-30km no-60km kanti lo mjaho uzokube ungenelwe ngabasubathi abaningi abahlonishwayo eNingizimu Afrika.

Phakathi kwabo kukhona uNkosikhona Mhlakwana obhekwe ukwenza kahle kwiComrades Marathon yanonyaka, umqeqeshi wakhe uProdigal Khumalo, uMartin Ngwenya weMaxed Elite, uNkosinathi Duma, uMdu Khumalo wePhantane ukubala nje abambalwa.

“Kubuhlungu ukuhlangana nomsubathi egijima ngeteku obona kahle ukuthi kuyefana nokuthi uhamba ngezinyawo Sizozamela bona amateki nokusiza abaya kwiComrades ukuzilungiselela ngoba kubalulekile ukuba ifike sisesimeni esikahle. Ngijabule kakhulu ukuthola lezi zingwazi ezifana noKhumalo, uMhlakwana, uMthoko Khuzwayo, uNgwenya nabanye,” kusho uMoses Gazu woLundi Striders.

Uthi iPhantane imthembise ukuthi izofika nabo bonke abasubathi bayo bamabanga amade ukuzomeseka.

Uthi noXolani Mabhida uzokube eyingxenye yayo kanti umsubathi ongakabuyeli kubona, nguBongumusa Mthembu.

Lo mjaho uzosukela eShell Garage uma ungena oNdini, ukhuphuke uwele umfula iMfolozi, ubuye nge-19 ubheke egalaji. Abenza u-60km bazophinda kabili.

Uphethe ngokubonga uMasipala uLundi ngokubaxhasa ngetende, ihholo okuzolala kulona abagijimi nokunye, wabonga i-Oasis yasoNdini ebaxhase ngamanzi, i-Orange Grove, i-Aquelle, i-3838 Shisanyama, iVikamana Guesthouse, iGazu Legacy ukubala nje abambalwa.

UGazu uphethe ngokuthi umjaho ohlelwa yikilabhu yabo nonyaka, uzokuba ngomhla ka-13 kuLwezi (November).