Abesibhakela badonswe ngendlebe ukungabhacazi
Ezimpini zaseKZN ezizoboniswa kwiSABC TV ngelizayo
BADONSWE ngendlebe uZandile Malinga onguphromotha noMike Dube oyisikhulu esiphezulu seBoxing South Africa (BSA) Kwa-Zulu-Natal ukuba "bangashayi ngaphansi kwebhande" uma sekufika usuku lomqhudelwano wezimpi ezibhekwe ngabomvu eGreyville Hall, eThekwini ngeSonto elizayo.
UNtsikayezwe Sithole, obebizelwe nguZandile noDube esigcawini nabezindaba eGarden Court, eMhlanga, ngoLwesibili, uveze ukuthi njengoba lezi zimpi zizosakazwa bukhoma kwiSABC TV, kakumele kwenzeke into engafaka isibhakela ehlazweni.
I-BSA isembhidlangweni wokubuyisa isithunzi, okuzokwenza kubuye abaxhasi asebehambela kude nalo mdlalo, kuhle kwelanga lasebusika.
USithole - okucacile ukuthi akasinisi mahleza - uthe: “Zandile noMike, ngiyanicela ukuba yonke into ihambe ngohlelo ngosuku lwezimpi.
“Laphaya kuzobe kukhona abantu abafuna ukungena baxhase isibhakela, ngaleyo ndlela kakumele kube nechashaza njengoba izimpi zizokhonjiswa bukhoma kwiSABC TV.
"Ngiyethemba nizoshaya into ecokeme. Kumele siwulwe lo mkhankaso wokuvusa isibhakela ezweni lonkana.
“Niwatshele namabhokisa ukuthi kumele azithengise njengoba esezolwa ebukwa cishe yizwe lonke.
"Kwazi bani, kungenzeka azitho-lele uxhaso nawo ngawodwana.”
UZandile uyamukele inselelo abaphoselwe yona, wathi bazokwenza konke okusemandleni ukwenza usuku lwezimpi lube yingqophamlando.
Ubemamatheka into engapheli ngesikhathi echaza ngokuqhatha abashayisibhakela abachaze njengalabo abazoshiya abazohambela umqhudelwano bebheme bakholwa.
“Okumnandi wukuthi noma ngabe kukhona ohlulwayo kulaba abane abazolwa, izicoco ezimbili zizosala KwaZulu-Natal, okuyinto ezosijabulisa kakhulu njengophromotha ngoba sibhekwe kakhulu nawumnyango wezemidlalo ukuthi senzani ngempela ngalolu xhaso osinika lona minyaka yonke.”
Kulezi zimpi, uSimiso Buthelezi noSiphesihle Mntungwa bazobanga ibhande elingaphethwe muntu leWBF All Africa Lightweight imizuliswano eyishumi.
UButhelezi ngowaseMandeni kanti isitha sakhe sidabuka eCato Ridge ephakathi kweTheku noMgungundlovu.
UThema Zuma waseClermont noBathabile Ziqubu waseDundee, bazobanga esingaphethwe muntu sabesifazane saseNingizimu Afrika kwiJunior Bantamweight imizuliswano eyishumi.
Kuqhathwe noMduduzi “Sgora” Mzimela waseMpangeni othishwa njengengqwele yakusasa noLucky Hobyane empini yeJunior Featherweight eyimizuliswano emine.
Zonke lezi zimpi zizobhulela amazolo enkulu, ephakathi kwengqwele kazwelonke kwiJunior Welterweight uPrince Dlomo waseMgungundlovu - kodwa ohlala eMzimhlophe, eGoli - noXolani Mgidi wasesifundazweni iMpumalanga.
UZandile uthe bazohambela inxanxathela yezitolo iPavilion, eWestville, eThekwini ngoMgqibelo, ngenhloso yokuheha abantu ukuphuma ngobuningi ukuyozitika ngezimpi.