OweDowns ubona awaseKZN ezoshubisa
UMngqithi uthi iSundowns iyazidinga izimbangi ezintsha kwiligi
UBONA ukwanda kwamakilabhu aKwaZulu-Natal kwiDStv Premiership kuzoqinisa amathuba okuthi enye yawo ibalwe nazolwela izicoco kulesi sigaba ngesizini ezokwethwasa ka-2022/23 uManqoba "TV" Mngqithi ongumqeqeshi weMamelodi Sundowns.
UMngqithi ohola ithimba labaqeqeshi bezingqwele zeligi, iSundowns, uveze ukwenama kwakhe ngemuva kokuba iRichards Bay FC ijoyine AmaZulu FC, iMaritzburg United, iRoyal AM neLamontville Golden Arrows kwi-premiership, wachaza lokhu njengento ezozuzisa iKwaZulu-Natal.
“Bekulokhu kuyisifiso sami ukuthi kwenzeke into enjena ngoba ngikholwa wukuthi eyodwa yala makilabhu ingakwazi ukubopha inqanawe ezokwazi ukulwela izicoco.
"Phela manje lokhu kuchaza ukuthi (amakilabhu aKwaZuluNatal) ngeke esalokhu eyodlala imidlalo eminingi ekuhambeni.
"Uma ubhekisisa, awaseGauteng avame ukuhanjelwa kahle yizinto ngoba kawaphumi kaningi ngaphandle ngoba maningi amakilabhu akhona.
“AwaKwaZulu-Natal nawaseWestern Cape, abefa wukuthatha njalo izindiza eyodlala.
"Njengoba sekumi kanje, kuchaza ukuthi ikilabhu ngayinye ingazithola idlala imidlalo eyishumi KwaZulu-Natal.
"Ngokwami iSundowns iyakudinga ukuphonselwa inselelo njengoba sekuhambe isikhathi eside izidlela amahlanga kanti ngicabanga ukuthi sizobona ibhola elimnandi nelishubile ngesizini ezayo,” kusho uMngqithi.
UMngqithi ubekhuluma ngemuva kokuguqisa iRoyal AM ngo-3-2 emdlalweni obushubile eChatsworth ngoMsombuluko. AmaBrazilian - asedle isicoco seligi amahlandla awu-5 kulandelana - anqobe ngegoli likaGaston Sirino, elikaThabiso Kutumela nelikaPeter Shalulile kwathi aweAM aqhamuka noMzwandile Dlamini noVictor Letsoalo.
UMngqithi uveze ukujabula ngokusonga isizini ngegiya eliphezulu ekubeni ikhempu yakhe ihlaselwe wumkhuhlane ogadle kubadlali abaqavile okunguThemba Zwane, unozinti uReyaard Pieterse, u-Andile Jali, uThapelo Morena noMusa Lebusa izindawo zabo ezithathwe nguLyle Lakay, uSiphelele Mkhulise noSirino.
UMngqithi ubuye washayela izandla iRoyal AM eqeqeshwa nguJohn Maduka ngokubathwalisa kanzima kulo mdlalo wathi ngokwakhe, imangalise abaningi ngokushisisa umbango ngale ndlela ekubeni ekuqaleni kwesizini izinto zazimapeketwane ekhempini yayo.
“Iqiniso lithi, akekho obezitshela ukuthi singayibona ikuleli giya kanti ngokwami ngiyibona inethuba lokungena kwiCaf Champions League.
"Iliphephezelise phezulu ifulegi laKwaZulu-Natal, kumele siyishayele ihlombe,” kusho yena.
UMaduka ukhale ngokuthi bebengenazo izitobha, yingakho begaxe abadlali esiswini okwenze bathwala kanzima ukubhekana nabadlali beSundowns.
Lo mqeqeshi waseMalawi uthe unethemba lokuthi uma behlule i-Orlando Pirates kusasa ngoLwesihlanu, bazongena begijima kwichampions league.