KUPHELILE UKUQAGELA NGEKUSASA LOMQEQESHI WO-SUTHU
UWUNIKWE ngokuphelele umsebenzi wokuqeqesha AmaZulu FC uBrandon Truter (osesithombeni) yize esonge isizini ngenothi eliphansi ezakhe ziguqiswa esibayeni sazo, iMoses Mabhida Stadium ngomkhaya iLamontville Golden Arrows ngo-2-1 ngoLwesibili ntambama.
UTruter ulandwe sekusele imidlalo eyisikhombisa kuqedwe isizini ngemuva kokuxoshwa kukaBenni McCarthy.
Unqobe emibili, wadlala emine ngokulingana, wahlulwa kanye.
Le miphumela iwelise ngelibanzi AmaZulu FC njengoba ezogijima kwiMTN 8 ngesizini ezayo.
Ekhuluma nabezindaba ngemuva komdlalo ne-Arrows, ubukeke engatshengisi ukuthi ungumuntu ohlafuna ejeqeza kwazise bekungenzeka itoho limphelele.
USandile Zungu ongumengameli woSuthu, ukuqinisekisile ukuthi uTruter uzokube elolonga le kilabhu ngesizini ezayo. Uthe bamnike ngokugcwele lo msebenzi ngemuva kokwenza kahle kule midlalo abebanjiswe yona.
“Uma ubheka imiphumela nendlela izinto ezihambe ngayo, noma yimuphi umqeqeshi angaba nalo iqholo lokuthi wenze kahle, kodwa kangizishayi isifuba. Kubathathe isikhashana abadlali bami ukujwayela isitayela sami, kodwa ngeke ngibasole ngoba ngokwami okunye kuhambe kahle,” kusho uTruter.
ILANGA lithole ukuthi lo mqeqeshi - ozigqamise kwiRichards Bay FC isakwiGladAfrica Championship wafika wagila izimanga kwiSwallows FC ngesizini edlule - useludwebile uhlelo lokulungiselela ukuqala kwesizini ezayo (pre season) njengoba ezosondeza abaqeqeshi beDiski Challenge uNina Vilakazi no-Ayanda Dlamini.
Ephawula ngokunqoba kwabo uVusimuzi “Kanu” Vilakazi weArrows, uncome abadlali bakhe nesekela uMabhudi Khenyeza ngokulalela imiyalelo yabo.
“Kusizile ukuqala ngesivinini, okwenze sathola igoli lokuvula inkundla kuqala. Sikubonile lokhu sikwenza emidlalweni edlule.
"Abafana bethu bavele bakhathala maphakathi nomdlalo, kodwa ngemuva kokulungisa okuthile, sikwazile ukubuya ngamandla sabuya nawo amaphuzu ephelele,” kusho uVilakazi.
Abafana Besithende bahleli endaweni ka-8 ngamaphuzu awu40 kwi-log yeDStv Premiership, bazomincela ukuthi iSuperSport United enamaphuzu awu-37, yehlulwe yi-Orlando Pirates ngelizayo ukuze bangaphumi kwi-top 8.
Mayelana nokuthi bengazizwa benjani uma usihlalo we-Arrows, uMato Madlala ebagixabeza izikhundla zokuqeqesha ngokugcwele benoKhenyeza, uKanu uthe: “Kawukho umbandela ebesibekelwe wona ukuthi kumele siqede kuphi nendawo kwi-log. Mina noMabhudi siyizingane zakwiArrows. Noma kungathiwa sinikwa umsebenzi wokuhlanza ithoyilethi singawuthatha singabi nankinga.”