Unikwe inkontileka ovike izembe lePSL
I-Galaxy izokwenza amalungiselelo esizini entsha eGermany
UGIXABEZWE ngeminyaka emibili enkontilekeni yakhe umqeqeshi osindise iTS Galaxy ezembeni eligcine ligawula iBaroka FC kwiDStv Premiership.
USihlalo weGalaxy, uTim Sukazi, ufuna ukuba umqeqeshi waseGermany uSead Ramovic (osesithombeni), ahlale kuze kube wunyaka ka-2026 ngoba uyabona ukuthi uzoyishintsha le kilabhu igile izimanga kulesi sigaba.
URamovic wafika kule kilabhu maphakathi nesizini izinto zimapeketwane, kodwa yize emusha ebholeni lase-Afrika, wakwazi ukusibamba isitayela.
IGalaxy ivale isizini ngenothi eliphezulu ishayela ekhaya iChippa United ngo-1-0 eNelson Mandela Bay Stadium, eGqeberha, ngeledlule.
ILANGA lithole ukuthi uRamovic ubeseludwebe kudala uhlelo lokuthi ufuna ezakhe ziyokhempa ngakubo eGermany ngenhloso yokungcweka namakilabhu asezingeni eliphezulu, adlala kwiBundesliga, kanti bazohlangana namanye amakilabhu ase-Europe nawo azobe ekhempele khona.
Umxhumanisi weqembu, abalandeli nabezindaba, uMinenhle Mkhize, akavumanga futhi akaphikanga ukuthi bazolayisha imithwalo yabo ngoNtulikazi (July) belibangise eGermany.
“Engingakusho wukuthi umqeqeshi wethu wazibophezela ekutheni uzosebenzisa uzwano lwakhe namakilabhu amaningi aseEurope - njengoba wadlala ngakubo, eNorway naseSerbia - ukuvulela iminyango abadlali bethu abafisa ukuzibona begudlana amahlombe nabanye abadlali beqophelo eliphezulu.
“Okunye okuhloswe ngusihlalo wethu, wukukhulisa igama lekilabhu emazweni aphesheya njengoba seyaziwa nase-Afrika kwazise sike sadlala kwiCaf Confederations Cup ngemuva kokugila izimanga, siqumba phansi amakilabhu amakhulu njengeKaizer Chiefs.
Usihlalo ufuna ukuqinisa amaxhama okuxhumana namakilabhu aphesheya njengoba kwenza iMaritzburg United enobudlelwano ne-Arminia Bielefeld yaseGermany, iSuperSport United enobudlelwano neFeyernoord yaseNetherlands namanye amakilabhu akuleli,” kusho uMkhize.
Lesi sikhulu esiveze ukuthi sesilalisa okwengane encane kulezi zinsuku kwazise iGalaxy isindile ezembeni, sibuye sadalula ukuthi kuzobongwa abalandeli bakwaNdebele namaphethelo ngendumezulu yomdlalo neqembu lesizwe, okusolwa ukuthi elaseSwazini, ozokuba KwaMhlanga Stadium eMpumalanga, ngomhla ka-31 kuNtulikazi.