I-BUCS ILINDELE UBUNZIMA KWI-ROYAL AM
I-ORLANDO Pirates ilindele ubunzima obukhulu kwiRoyal AM ezobhekana nayo koweDStv Premiership kusasa ngoLwesihlanu ngo-19h30 eChatsworth Stadium, eThekwini.
Womabili la makilabhu asesethubeni lokuqeda elele isibili kwi-log, okuyisango lokumela iNingizimu Afrika kwiCaf Champions League ngesizini ezayo.
Womabili kumele anqobe kumnyama kubomvu uma efuna ukugudluza iCape Town City esendaweni yesibili.
Ukudlala ngokulingana kungagcoba iCity njengesonge isizini ihlezi endaweni yesibili.
IPirates uma inqobe kwi-AM, kuzodingeka iphinde ithole umphumela ofanayo noma seyibhekene neSuperSport United kowokugcina weligi ngoMsombuluko ngo-19h30, eTshwane.
NeSuperSport idinga ukuwunqoba lo mdlalo ukungena kwi-top 8 egudluzwe kuyona yiLamontville Golden Arrows, emuva kokuhlula AmaZulu FC ngo-2-1 ngoLwesibili eMoses Mabhida Stadium.
UThembinkosi Lorch oyisilomo sePirates, uthi nakuba imizimba seyizwela wukukhathala njengoba begijime imidlalo eminingi kule sizini, kodwa bazimisele ngokubuya namaphuzu agcwele kowe-AM.
IBucs ngoLwesibili ebusuku ihlule iMaritzburg United ngo-4-1 koweligi eSoweto.
Amagoli ayo aqatshuliswe enethini nguLorch, uKwame Preprah, uDeon Hotto noKabelo Dlamini kwathi eleMaritzburg lahlohlwa nguFriday Samu.
“Ngithanda ukubonga oPhezulu ngekhono angiphe lona, ngiyathembisa ukuthi ngizolihlonipha.
"Ngikholwa wukuthi bonke abantu bayazibonela ukuthi sinokukhathala, ikakhulukazi njengoba besidlala nakowamanqamu weCaf Confederations Cup ngeledlule.
“Sekuyazwela. Nokho kufanele siqhubeke sifuqe, kakukho okudlula lokho ukuze sithole amaphuzu amathathu kowe-AM, okuwumdlalo ongeke ube lula, kodwa kufanele sizilungiselele kahle siqinisekise ukuthi siyanqoba,” kusho uLorch owagoduka nomklomelo wePlayer of the Season nowePlayer's Player of the Season ngo-2019.