I-Downs imincile ngabadlali
Isethubeni lengqophamlando kwiPSL
UBAMBE umoya ngabadlali bakhe abamqoka uManqoba “TV” Mngqithi ongumqeqeshi weMamelodi Sundowns, okuvela ukuthi baxinwe wukugula.
IDowns izogadulisana neMarumo Gallants kowamanqamu weNedbank Cup ngoMgqibelo ngo-18h00 eRoyal Bafokeng Sports Palace, eRustenburg.
Iya kulo mdlalo nje, ngoMsombuluko inikwe ngokusemthethweni inkomishi yokuba yizingqwele zeDStv Premiership emdlalweni lapho eguqise khona iRoyal AM ngo-3-2 eChatsworth Stadium.
Abadlali beDowns okubalwa kubo uDennis Onyango, uThemba Zwane, uLyle Lakay no-Andile Jali (osesithombeni), kabazange babonakale kulo mdlalo ngenxa yomkhuhlane.
“Kuzoba wumdlalo onzima kwiMarumo, kuzofanele sizilungiselele ngokweqophelo eliphezulu. Nginethemba lokuthi bonke laba badlali abanomkhuhlane kuzoshaya usuku lwalo mdlalo sebeyimiqemane
"Bonke abadlali abangabonakalanga emdlalweni weRoyal AM, bebexinwe wukugula, siye kuwona nabadlali abawu-17 nje kuphela, bonke laba abanye bebegula,” kusho uMngqithi.
Uthi kuningi okufanele bakulungise ngaphambi komdlalo neGallants.
“Kuzofanele sizame ukulungisa udonga lwethu emuva, sidedela amagoli alula.
"Uma sizovuzisa amagoli kalula, singaba senkingeni kowamanqamu.
“Ngethemba ukuthi sizoya kulo mdlalo sesilungisile ngoba siyayifuna le nkomishi. Yisiko lethu lapha kwiSundowns ukunqoba izinkomishi,” kusho uMngqithi.
Uma iDowns inqoba iNedbank Cup, izokuba yikilabhu yokuqala kuleli ukushanela zonke izicoco ezidlalelwayo ngesizini eyodwa selokhu kwasungulwa iPremier Soccer League (PSL) ngesizini ka-1996/97.
Nokho izokuba ngeyesibili ukunqoba izicoco ezintathu ngesizini eyodwa, emuva kwe-Orlando Pirates eyaziqukula amasizini elandelana ngo-2010/11 nango-2011/12.
Kuwo womabili la masizini iPirates eyanqoba ngawo izinkomishi ezintathu, yayisuke ihlulwe yisicoco esisodwa.
Kule sizini bekuvele kubangwa ezintathu okuyiMTN8, iligi neNedbank Cup njengoba sekwaphela ngeTelkom Knockout.