Ngimethulela isigqoko uNgqongqoshe wezokuThutha KwaZulu-Natal
MHLELI: Kakusavamile ukunconywa kwezisebenzi zikahulumeni, kwesinye isikhathi sesibukeka sengathi sihlalele ukugxeka yonke into kanti phela sisuke siswele khona esingakuncoma.
Namuhla ngithanda ukwethulela isigqoko uNgqongqoshe wezokuThutha KwaZulu-Natal (uNkk Neliswa Peggy Nkonyeni) ngoshintsho afike nalo kulo mnyango.
Ngiyaqaphela ukuthi imigwaqo edinga ukufakwa umgubane sekusebenza izisebenzi zalo mnyango, zisebenzisa amaloli abukeka sengathi masha ceke.
Siyakubonga akwenzayo ngoba ibisiphelile imali kahulumeni - okuyintela yomphakathi - kugixabezwa abantu ngamathenda obekugcina kwenziwa umsebenzi ongekho ezingeni elifanele.
Kangiqali ukukuqaphela lokhu, ngibonile futhi esebenzisa izisebenzi zikahulumeni ukuvala imigodi emigwaqweni.
Akwenzayo kuhle. Kumele abongwe umuntu uma enza kahle ngoba phela sikhwela sidilike nxa bengenzi kahle.
Sesingamcebisa ngokunye okumele akusukumele emigwaqweni, njengezikhotha eduze kwemigwaqo.
Ngendlela osekwene ngayo, izihlahla sezisitha ngisho amabhodi aseduze kwemigwaqo, abekelwe ukuxwayisa abashayeli.
Iningi lawo selasithwa yizihlahla ezinye zazo esezaphundlwa ngisho ngamaloli amakhulu.
Okokugcina okuhle, wukuthi nezithobisasivinini (humps) - eziphoqa abezimoto ukunciphisa isivinini emigwaqweni - umnyango usuyazenzela
Ngokwenzenjalo, izisebenzi zomnyango seziyakwazi ukubeka ibhodwe eziko emindenini yazo, kakusafani namakinati abeziholelwa wona ngabamathenda.
Kuzona-ke izithobisasivinini, ake ku-be nendlela efanayo elandelwayo, ezinye zakhiwa zicije zibe yizingedla, seziphelile izimoto ezincane ngaphansi.