Sengathi izigwaze ngowayo iBucs kolukaMhango
KUMELE ishayelwe ihlombe i-Orlando Pirates ngokuphephezelisa ifulegi laseNingizimu Afrika kwiCaf Confederations Cup, yize igcine ilale isibili kulo mqhudelwano ihlulwa yiRS Berkane yaseMorocco ngo-5-4 wamaphenathi kowamanqamu ngoLwesihlanu ebusuku eNigeria.
Ukuhamba ibanga elide kwamakilabhu akuleli emidlalweni yase-Afrika, kuhle ngoba kunika abadlali isipiliyoni esimqoka, abakwazi ukusisebenzisa uma sebemele iBafana Bafana esahlalelwe wumsebenzi wokubuyisa isithunzi sayo ebholeni lomhlaba.
NgoNtulikazi (July), kuzoqala imidlalo yokuhlungela i-Africa Cup of Nations (Afcon) ezodlalelwa e-Ivory Coast ngonyaka ozayo. Sinethemba lokuthi abadlali bePirates nabeMamelodi Sundowns ephume kumaQuarter Final eCaf Champions League kule sizini, bazofika nokhakhayi oluqinile kwiBafana, bayisize ingene kwi-Afcon.
Phela kuyihlazo ukuthi iBafana seyijwayele ukuyibuka komabonakude le midlalo yize amakilabhu akuleli agijima kwiPremier Soccer League (PSL), enza kahle emidlalweni eyahlukene yeCaf minyaka yonke.
Sekufana nosiko ukuthi elakuleli libe nekilabhu edlala kowamanqamu njengoba ngesizini edlule iKaizer Chiefs iguqiswe yi-Al Ahly yase-Egypt kowamanqamu weCaf Champions League. Ukwenza kahle kwamakilabhu akuleli emidlalweni yeCaf, yikhona okwaholela ekutheni avulelwe izikhala eziningi njengoba esenezine, okungezimbili kwi
champions league nezesibalo esifanayo kwi-confederations cup. Okunye okuhle ngokwenza kahle kwamakilabhu akuleli kwiCaf, wukuthi asuke eqhutshwa ngabaqeqeshi abawumsinsi wokuzimilela, okukhombisa ukukhula kubona.
Nokho kujabhisile ukuthi iBucs ihlulwe kowamanqamu ishaywa yisifo osekunesikhathi eside sacaca, senkinga yaphambi kwamapali.
Yize singazazi izinkinga zangaphakathi kuyona, kodwa kakuphusile ukugcina umgadli ongalibheki ipali njengoGabadinho Mhango waseMalawi ekhuhla ibhentshi. Siyazi ukuthi lo mgadli uke waziphatha budlabha ngaphandle kwenkundla, nokho sizibuza ukuthi kunabuphi ubulungiswa ukunganikwa kwakhe ijezi kumaBhakabhaka ekubeni ekhombisile kwi-Afcon ebingasekuqaleni konyaka eCameroon ukuthi uyayibona imbobo yamapali.
Phela uMhango ushayele iMalawi amagoli ayenze yangena okokuqala emlandweni esigabeni somkhumulajezi kwiAfcon. Akahlohlanga amagoli alula, kodwa ushaye awezinga eliphezulu.
Emuva kwe-Afcon, yajabhisa inkulumo yomunye wabaqeqeshi bePirates, uMandla “Mhloli” Ncikazi lapho wacashunwa khona ethi okwenze lo mdlali wadlala kwi-Afcon yize eqiwa yijezi kwiBucs, wukuthi mhlawumbe izinga layo (i-Afcon) lingaphansi kwePSL.
Yize iBucs ifinyelele kowamanqamu weCaf Confederations Cup, kodwa ukunganqobi kwayo kungase kube nomthelela ongemuhle ekusaseni labaqeqeshi bayo njengoba abalandeli bevele bengayizwa kahle indaba yabo.