Kuthiwa ubugebengu yibona obuyisizathu sokucisha kukagesi
Lokhu kuvezwe yisikhulu sakwa-Eskom ngesikhathi sivele kwiScopa
YINQWABA yabantu okubikwa ukuthi ibhekene nengalo yomthetho ngenxa yezinsolo zokweba, ukukhwabanisa nokuphazamisa ukusebenza kwenkampani ephehla amandla kagesi eNingizimu Afrika, i-Eskom.
Babalelwa ku-25 abasanda kuboshelwa lezi zinsolo. Lokhu kuvezwe yisitatimende esikhishwe wuhulumeni izolo ngeSonto. Phambilini izikhulu zeEskom zibalule indaba yobugebengu njengenye yezinto ezikhinyabeza ukusebenza kwale nkampani, futhi ezinomthelela enkingeni kagqamcishi (load shedding).
UMnu Andre de Ruyter oyisikhulu esiphezulu kule nkampani kodwa osesulile emsebenzini, ngesonto eledlule ngesikhathi i-Eskom ivele phambi kwekomiti lasephalamende elibheke ukusetshenziswa kwemali yomphakathi, iStanding Committee on Public Accounts (Scopa).
Ukubalulile ukuthi enye into ekhinyabeza ukusebenza kweEskom, wubugebengu.
Utshele leli komidi ukuthi idlangile inko-hlakalo nobugebengu e-Eskom. Kuzokhumbuleka ukuthi nyakenye uhulumeni unqume ukutshala amasosha kwezinye iziteshi ezinkulu zakwa-Eskom, ngenxa yobugebengu obenzeka eziteshini zale nkampani.
Kuke kwasabalala imibiko yokuthi kukhona abathile abaphazamisa ngenhloso ukusebenza kwe-Eskom, okunomthelela obhebhethekisa inkinga kagqamcishi. Kuzokhumbuleka futhi
nokuthi ngoLwezi (November) wanyakenye, kuboshwe onogada ababili abasolwa ngokweba izinkulungwane zamalitha kadizili esiteshini esiphehla ugesi, iPort Rex, esise-East London, e-Eastern Cape.
Ngawo futhi uLwezi nyakenye, kuvele ukuthi kuboshwe abashayeli bamaloli athutha amalahle, ababoshwe esiteshini esiphehla ugesi iKendal, eMpumalanga, emuva kokutholakala namalahle okwebiwa.
Kuphinde kwaboshwa nomunye umshayeli weloli elithwala amalahle esiteshini esiphehla ugesi iCamden, eMpumalanga. Yena watholakala namalahle angekho esimeni. Kusolwa ukuthi wawashintsha ngoba kubikwa ukuthi wayekade esuke emayini ethwele amalahle afanele.
Izolo ngeSonto uMnu Mondli Gungubele ongungqongqoshe eHhovisini likaMengameli, uthe uhulumeni uyaqhubeka nokusebenzisa uhlelo lwezamandla olubizwa phecelezi, nge-Energy Action Plan, okuhloswe ngalo ukuba kufezwe inhloso yokuhlinzeka
ngogesi owanele futhi ongenazinkinga. Nokho ukubalulile ukuthi inkinga yokushoda kwamandla kagesi izwe elibhekene nayo, ngeke iphele manje.
“Njengezwe, kumele sivume ukuthi kalikho ikhambi elisheshayo kule nkinga, kodwa-ke izakhamizi kumele ziqaphele ukuthi umsebenzi uyaqhubeka ukuze kuqinisekiswe ukuthi uhlelo lwezamandla lusetshenziswa ngokugcwele nangempumelelo,” kusho uMnu Gungubele.
Uhulumeni ubika ukuthi i-Eskom isilande abantu abawu18 abangochwepheshe ababeyizisebenzi zayo, yababuyisela emsebenzini.
Phakathi kwalabo kubalwa abathathu ababengabaphathi beziteshi lapho kuphehlwa khona ugesi, abazolekelela eziteshini ezinkulu; iKendal, iKoeberg naseMedupi.
Uhulumeni uthi uyaqhubeka umsebenzi wokukhuphula izinga lokusebenza kweziphehlimandla e-Eskom, ukuze kudanjiswe ukucishwa kukagqamcishi wezigaba eziphezulu.