INKATHA KAYINALO UVALO NGOKWALIWA YI-EFF "EWUMEBUZO"
USIHLALO weNkatha Freedom Party (IFP) KwaZulu-Natal, uMnu Thami Ntuli, uthi akukho nowodwa umasipala ozobalahlekela njengoba i-Economic Freedom Fighters (EFF) isabisa ngokuthi ifuna ukuyikhipha emandleni kwabanye omasipala. “Bayikake la ingasalele khona, awukho nowodwa umasipala ozosilahlekela,” kusho uMnu Ntuli.
Uthe ukuphatha kwe-IFP komasipala engene kubona emandleni ngokwesekwa ngamanye amaqembu, akuncikile kwi-EFF - akhona amanye ebambisene nawo. “Manjeke lokhu kusabisa kwayo kuwumebuzo nje, akuseyona inyoka,” esho.
Namhlanje ngoMsombuluko i-IFP inesigcawu sabezindaba eThekwini lapho izophawula kabanzi, icacise ngokushiwo yi-EFF, esabisa ngokuthi izokwethula futhi yeseke iziphakamiso zokuba kukhishwe izimeya ze-IFP ngevoti lokungabethembi ubuholi bazo kubona bonke omasipala eke yavota nabo phambilini.
Kulab’ omasipala ibala abezifunda okuyiZululand, aMajuba, uThukela, uMkhanyakude neKing Cetshwayo, bese kuba yilabo abangaphansi kwezifunda okuwuMasipala wasoNdini, owa KwaNongoma, eMtubatuba, eMhlathuze, eJozini, eDannhauser, e-Alfred Duma, e-Inkosi Langalibalele,
Abaqulisi, uPhongolo noMhlabuyalingana.
Esigcawini sabezindaba, umholi we-EFF, uMnu Julius Malema, uthe ngomhla ka-20 nangomhla ka-25 kule nyanga, babe nemihlangano ne-IFP ngobudlelwano bokusebenzisana kusukela ngokhetho lohulumeni basekhaya lwango-2016.
Uthe le mihlangano iyingxenye yemizamo yokudala uzinzo komasipala abaphethwe ngohulumeni wobumbano lwamaqembu, futhi okudala ukumeleleka ngokulingana nokwabelana ngamandla kumadlelandawonye kubo bonke omasipala.
Ngokusho kukaMnu Malema, i-EFF inqume ukunqamula ubuhlobo ne-IFP emuva kwale mihlangano ngokubona ukwehluleka kwayo (IFP) ukwazisa isidingo sokusebenzisana nalabo ababambisane nayo ukuze ikwazi ukuhola kulab’ omasipala.
Usola i-IFP ngokufuna ukugodla wonke amandla, okuyiyona into athi ibenza bengathokozi ngokusebenza nayo.
Uthe bake bazama ukwenza isivumelwano ne-IFP sokuba ibanikeze uMasipala waseMhlathuze, basho futhi ukuthi uma ingakwazi ukubanikeza wona, ingabanika noma yimuphi omunye kodwa i-IFP yala yaphetha. “Ngenxa yalokhu, i-EFF izokwethula futhi yeseke iziphakamiso zokungabethembi ubuholi bazo zonke izimeya ze-IFP kubona bonke omasipala esike savota nabo,” kusho uMnu Malema.
Uthi sebebazisile ubuholi be-IFP ngesinqumo sabo, bayalela amasekela ezimeya angamalungu e-EFF ukuba esule ezikhundleni, abe ngamakhansela ajwayelekile. Kwenzeka lokhu nje, amaqembu amakhulu aphikisayo kuMasipala weTheku, okuyiyona i-IFP neDA, kulindeleke ukuba ahlangane namhlanje, adingide ngesiphakamiso se-Active Citizens Coalition (ACC), sokungabe-thembi ubuholi bemeya, uMnu Mxolisi Kaunda. I-EFF isigaxene ne-ANC kulo masipala.