BAKLONYELISWE NGEMIFUNDAZE NGABELANGA NE-BEREA TECH
KUFEZEKE amaphupho kubafundi abathi bazabalaze kakhulu, belwela ukungena ezikhungweni zemfundo ephakeme kodwa kungenzeki ngenxa yokuntuleka kwemali.
Lokhu kwenzeke emuva kokutonyulwa kwabafundi abawu-10 emncintiswaneni waminyaka yonke weLANGA ngokubambisana neBerea Technical College, abanikwe imifundaze.
Kulo nyaka kuhlomule uMhlonishwa Dlamini waseDonybrook oyokwenza iMaritime Studies, uSiyabonga Mabaso waseThekwini oyokwenza i-Accounting, uChristine Phiri waseMayville ozokwenza iPublic Relations, uNokuphila Nxumalo wasePinetown ozokwenza iPsychology General, u-Andy Ndleleni waseSipingo, eThekwini ozokwenza iMaritime Studies, uNoluthando Nguza waseWaterloo, eThekwini ozokwenza iSecurity Management, uBhekisabelo Gumbi waseVryheid ozokwenza iFinancial Management, u-Andiswa Msombi waseMobeni, eThekwini ozokwenza iBusiness Management, uBusiswa Moco waKwaMashu ozokwenza iHuman Resource noNompilo Ngcobo waseNtuzuma, eThekwini ozokwenza i-Educare.
Isikhulu esiphezulu eBerea Tech, uMnu Sbongiseni Magwaza, sithe kuyisinqumo sabo njengesikole ukuthi bafake isandla empilweni yabantu, ikakhulukazi kubafundi beLANGA.
Sithe bakholelwa kakhulu kuleli phephandaba ngenxa yokuthi lithembekile kubafundi balo njengoba sekunesikhathi eside libika izindaba esizweni.
“Inhloso yethu wukuphendula impilo yabantu siyenze ibe ngcono. Abafundi sibakhokhela konke ngokubambisana neLANGA, kuze kube baphothula iziqu zabo ngokweminyaka ebekiwe.
"Yingakho sigqugquzela ukuthi labo asebehlomulile baliphathe kahle leli thuba bafunde ngokuzimisela,” kusho uMnu Magwaza.
Uthe lo mncintiswano uvuleleke nakubafundi abebefunda, kodwa baba nenkinga yemali phakathi nemfundo. yabo. Uthe bahlose nokugqugquzela abaphelelwe yithemba lempilo ngenxa yokwentula emindenini yabo.
“Umncintiswano wethu wenze omkhulu umehluko ebantwini, ngakho-ke sisazoqhubeka nawo,” esho.
USiyabonga Mabaso ongomunye wabahlomulile, uthe belingamphutheli ILANGA njengoba ebephokophelele emfundweni ephakeme.
Uthe isimo sakubo sesizoshintshwa yiLANGA neBerea Tech ngalo mfundaze.
UMhleli wephephandaba
ILANGA uMnu Philani Mgwaba, uthi iphephandaba
ILANGA linomlando omuhle wokweseka imfundo.
"Sizimisele ukuba lokhu kuqhubeke. Isibonelo nje, umsunguli walo, uDkt John Langalibalele Dube, uMafukuzela, wayeyazisa imfundo, waze wasungula isikole i-Ohlange Institute, osekuyiOhlange High namuhla.
"Kuyasithokozisa ukuba yingxenye yokuxhasa abafundi abampisholo ngemifundaze ezobasiza ukuzondla bona nemindeni yabo. Sihalalisela abafundi abahlomulile kule mifundaze, siyethemba bazolisebenzisa leli thuba elingandele bani,’’ kusho uMnu Mgwaba.