"UJehova uvula iminyango uma kuyisikhathi esifanele"
UBONGA ithuba alinikwe nguNkulunkulu lokukhipha i-albhamu ye-gospel umhlengikazi owazalelwa eLesotho, kodwa osesebenza e-England, okholwa wukuthi ukubambezeleka kwamaphupho, kusuke kungasho ukuthi ngeke afezeke.
UNthabiseng Khabane ocula i-gospel yesiSotho, uthi ungubufakazi balokho njengoba echithe iminyaka eminingi esebenza njengomhlengikazi kepha ekuhambeni kweminyaka, sagcina sifezekile isifiso sakhe sokuba ngumculi.
“Umculo ngiwuthande ngikhula futhi nasemndenini bewuthandwa yiwo wonke umuntu. Nasekhwayeni yenkonzo bengingasali,” kusho yena.
Uthi wafulathela iNingizimu Afrika eminyakeni ewu-21 edlule, wabhekisa amabombo e-England, eyosebenza njengomhlengikazi. Yilapho athi wathola khona ibandla, lavuseleleka uthando lomculo.
“Ngathola uhlobo lomculo olukhuluma nami, lwakubeka obala ukuthi ngibizelwe ekushumayeleni izwi leNkosi.
"Ekuqaleni nganginokungabaza ukushumayela ngomculo, ngangingaziboni ngiwufanele lo msebenzi wokushumayela ivangeli lombuso kaNkulunkulu,” kusho uNthabiseng.
Uchaza ukuba sengozini yemoto njengento emenze wasukuma, wakhipha i-albhamu ethi, “Thy Kingdom Come”, ngenxa yokuthi wazibona ethola ithuba lesibili empilweni.
“Umculo kawulula neze, udinga ukuba uvumele uNkulunkulu akusebenzise ukuze ukwazi ukwelapha imiphefumulo yabantu. "Umculo wami umayelana nokududuza nokwelapha imiphefumulo yabantu nokubonga uMdali,” esho.
Uthi uzizwa ebusisekile ngokuba seEngland njengomhlengikazi futhi akwazi nokwelapha imiphefumulo.
“Okuqalwa nguNkulunkulu uyakuphetha. Sengikulungele ukwenza umsebenzi wakhe, konke ngikubeke ezandleni zakhe,” ephetha. Uthi njengamanje umaketha i-albhamu ethi, “Ke Jeso Fela" okusho ukuthi nginxaniwe.