Ubuchwepheshe besimanje kolokwakha izindlu kuleli
Lolu hlelo luzobhekwa ukuthi izindlu zalo ziyakwazi yini ukumelana nelanga nezimvula
SEBUZOQALA naseNingizimu Afrika ukusebenza ubuchwepheshe bokwakha izindlu namabhilidi ngendlela eyahlukile, obubizwa nge-3D Construction Printing.
Izindlu zokuqala okuzovivinywa ngazo lobu buchwepheshe, zizokwakhiwa KwaZulu-Natal, bese kubhekwa ukuthi ziqhuba kanjani ngokuhamba kwesikhathi ngaphambi kokuba uhlelo lusatshalaliswe.
Kuzobhekwa ukuthi ziyakwazi yini ukumelana nesimo sezulu njengelanga elishisa kakhulu nezimvula ezinamandla.
Lolu hlelo lobuchwepheshe bokwakha lwethulwe e-University of Johannesburg (UJ) ngoLwesihlanu. Kuthenjwe ukuthi luzoba yisixazululo enkingeni yokundoda kohlelo lokwakhelwa kwabantu izindlu zemixhaso njengoba bebaningi abakhala ngokweswela izindlu.
UDkt Blade Nzimande ongungqongqoshe wezesayensi nokusungula (Science and Innovation), uthi iNingizimu Afrika ingakwazi ukuhlinzeka ngezindlu zemixhaso ezingaphezulu kuka-160 000 ngonyaka, kodwa ngenxa yezinselelo ezahlukene, kakwenzeki lokho.
“Kusukela ngo-2009, ukuhlinzika ngezindlu zomxhaso kahulumeni kwehla ngezinga elishaqisayo, okukhomba ukuthi kudingeka ukungenelela okusheshayo kukahulumeni nabathuthukisi bomhlaba (developers) abazimele,” kusho uDkt Nzimande.
Ubalule ukuba mathintanyawo kwabasembonini yezokwakha
ukwamukela intuthuko yezobuchwepheshe njengento edala umsebeni wokwakha ungahambi ngezinga elifanele nelidingekayo.
Uthi ukuphendula kulezi zinselelo
ezikhona, umnyango wakhe okuyiwona ongabaxhasi abakhulu balobu buchwepheshe, ubambisane ne-UJ ukuletha lolu hlelo.
Uthe baqoke le nyuvesi ukuba
iqhube umsebenzi wocwaningo ngalobu buchwepheshe futhi ivivinye ukwakhiwa kwezindlu ezizokwakhiwa ngabo. Uveze ukuthi lomshini wokuphrinta izindlu uthengwe ngo-R6 million.
Phakathi kwezinhlaka ezizobamba iqhaza kule projekthi, kubalwa noMnyango wezokuHlaliswa kwaBantu KwaZulu-Natal.
Ngokusho kukaDkt Nzimande, uMnyango wezokuHlaliswa kwaBantu KwaZulu-Natal, uhlele ukuthi kuqale ngokwakhiwa kwesikhungo somphakathi bese kwakhiwa izindlu kamuva.
Inhloso yokuqala ngesikhungo somphakathi, wukuba kukhonjiswe ukusebenza kwalobu buchwepheshe ngaphambi kokwakha izindlu zokuhlala abantu.
Indawo okuzokwakhiwa kuyona kubikwa ukuthi yiseMpangeni, ngaphansi kukaMasipala uMhlathuze. Lo mshini kubikwa ukuthi wakha izindonga zendlu uziqede esikhathini esingamahora awu-8.
Nakuba kuyinto entsha lena eNingizimu Afrika, kodwa kwamanye amazwe athathwa njengahamba phambili kwezobuchwepheshe, sebuyasebenza lobu buchwepheshe njengoba sekuvele kunezakhiwo ezimile. bhekin@ilanganews.co.za