IMBOKODO INGENA EBHIZINISINI LEZITHUTHUTHU EZIHAMBA NGOGESI
SEBEKULUNGELE ukubhekana nezinselelo zokuba ngosomabhizinisi abesifazane abathathu, abanamasheya esitolo esidayisa izithuthuthu ezihamba ngogesi, i-Agilitee Express, esizinze enxanxatheleni yezitolo eMhlanga, i-Ocean Mall.
Lokhu bakuveze ngoMgqibelo kwethulwa ngokusemthethweni lesi sitolo, emcimbini obuhanjelwe yizicukuthwane okubalwa kuzona osomabhizinisi nabakhiqizi balezi zithuthuthu.
Ibhizinisi kulesi sitolo lizoqhutshwa nguNkz Thobile Kheswa, uNkz Nomusa Nkosi noNkk Khabonina Sovendle.
Ekhuluma neLANGA uNkz Kheswa ozobe eyimenenja, uthe bazimisele ukulikhulisa leli bhizinisi likwazi ukuqasha inqwaba yabantu futhi lenze nomehluko empilweni yabo.
Uthe okuhle wukuthi abantu bazokwazi ukuzithenga noma baziqashe izithuthuthu baphinde bashintshe nama-battery uma esephelile.
UMnu Mandla Lamba ongumsunguli walezi zithuthuthu, uthe basezingxoxweni zokuthi izinxanxathela zezitolo kuleli zibe nezindawo zokushaja lezi zithuthuthu.
Uthe banobudlelwano nezikhungo zemfundo ephakeme lapho benika abafundi ithuba lokuqasha lezi zithuthuthu
isikhathi esisukela ehoreni kuya phezulu.
“Nezinkampani ezithengisa ukudla zingazithenga noma ziziqashe uma zifuna ukuhambisela abantu ukudla okuthengiwe,” kusho uMnu Lamba.
Uthe banazo izindlela zokuthi abantu abasebenzisa lezi zithuthuthu bangazitholi besenkingeni ngenxa kagqamcishi oqhubekayo ezweni.
“Ezitolo zethu bayakwazi ukushaja noma bashintshe ama-battery ukuze amakhasimende ethu aqhubeke ngezindlela zawo,” esho.
USolwazi Onkgopotse “JJ” Tabane ongusihlalo webhodi lakwa-Agilitee, uthe ukuqhamuka nalolu hlobo lwezithuthuthu esikhathini samanje, kunika
uhulumeni inselelo yokuthi ukhuphule amazinga okwakha ingqalasizinda.
Uthe lezi zithuthuthu zihlanzekile emoyeni ophefumulwa ngabantu. Phakathi kosaziwayo ababusise lo mcimbi kubalwa uSthandwa Nzuza ongumlingisi womdlalo owuchungechunge, iDurban Gen, uSiya Mhlongo ongumsakazi weMetro FM, abaculi beGospel u-Andile KaMajola noKholeka nomculi waseThekwini, uSlot oyilungu leqembu iSOS.
Kuvele ukuthi lesi yisitolo sesithathu salezi zithuthuthu eNingizimu Afrika njengoba esokuqala savulwa eCape Town, kwathi esesibili savulwa eFourways, eGoli.