Bathumbe "ilungu lesishayamthetho nomndeni walo"
Kusolwa ukuthi lokhu kuhlobene nenkinga yokwebiwa kwezimoto zakuleli ziweliselwe eMozambique
ZIGADLE emndenini welungu leANC elisesiShayamthetho saKwaZulu-Natal izinswelaboya ezintshontsha izimoto okusolakala ukuthi ziweliswa umngcele ohlukanisa iNingizimu Afrika neMozambique, KwaMhlabuyalingana.
ILANGA lithole ukuthi iqulu lezinswelaboya ligasele emzini kaMnu Sipho “KK” Nkosi - owayengunobhala weSadtu KwaZuluNa-tal - ngoLwesihlanu ebusuku, lamthumba nomndeni wakhe, lashaqa izimoto ezimbili. Kuthiwa zihambe naye zayomlahla ehlathini elaziwa ngokuthi kuseMgodini weMvubu, kwaze kwaba udedelwa ngehora lesishiyagalombili ekuseni.
NgoMgqibelo kubikwe ngesigameko sokutholakala kwezimoto ezintathu ebezithukuswe ehlathini elisemngceleni ohlukanisa lamazwe eNkomazi, eMpumalanga. Lezi zimoto zibanjwe wuphiko lwamasosha akuleli.
Kwenzeka lesi sigameko nje, ngeledlule umphakathi wakule ndawo ungqongqise ngomlilo ibhasi laseMozambique neloli lakhona. Abantu abakhulume naleli phephandaba, bathi badinwa wukuthi imoto yakuleli uma kwenzekile yawela umngcele, kuba lukhuni satshe ukuba idedelwe ekubeni umnikazi wayo eyibona.
ILANGA lithole ukuthi amalungu omphakathi wakuleli aseqale umkhankaso wokuvala zonke izimoto zakuleli eziphuma eManguzi okusolakala ukuthi kugibele kuzona abaseMozambique. Kuthiwa bayabadiliza ezimotweni kuthiwe mababuyele emakhaya kabasadingeki kuleli.
Lokhu kufakazelwe wumyalelo osabalele kuzona zonke iziteshi zamaphoyisa aseMkhanyakude, kuthiwa kufanele kukhishwe amaphoyisa ngamabili ukuze ezogada abantu baseMozambique ukuze bangazitholi beyizisulu zodlame olungase luqubuke njengoba kuvela ukuthi bayashaywa uma behliswa ezimotweni.
Ngawo uMgqibelo kusabalale izithombe zezimoto ezine okuthiwa ngezaseMozambique, ezishiswe ngabantu baKwaMhlabuyalingana. Ilungu lomphakathi elikhulume naleli phephandaba ngaphansi
kombandela wokuba kugodlwe igama lalo, lithe banethemba lokuthi uzoshesha ukufika lapho kufanele khona umyalezo njengoba le nkinga isithinta amalungu esishayamthetho.
“Ubaba uNkosi ungowokuzalwa KwaMnqobokazi, kuyona le ndawo (KwaMhlabuyalingana), kodwa uma sikhuluma ngenkinga yobugebengu kule ndawo, usuke engekho ngezizathu zomsebenzi wakhe. Sikholwa wukuthi inkinga yobugebengu izonqamuka ngoba kudala zihamba izimoto zakuleli.
“Kusanda kuthathwa imoto kaMasipala waseMkhanyakude. Abantu abakuhulumeni balwa nomphakathi uma ufuna ukuzibambela ngenhloso yokuqeda ngalobu bugebengu,” kusho leli lungu lomphakathi.
ILANGA lizame kaningi ukuxhumana noMnu Nkosi kwangalunga njengoba ucingo lwakhe belungangeni.
UMnu Joseph Ngubane ongusihlalo weCommunity Poling Forum (CPF) eMkhanyakude, uthe isigameko sakamuva esenzeke kulesi sifunda siwudinile umphakathi.
“Amalungu omphakathi adinwa wukuthi uhulumeni kawulaleli uma siwutshela. Basuka nezinhlelo zabo emahhovisi abahlala kuwona beze nazo lapha kanti kufanele bathathe amaqhinga esibanika wona singabantu bendawo. Siphakamisa ukuba kujutshwe indiza ezohlala emngceleni, ezohlala izungeza emoyeni ngaso sonke isikhathi.
“Uma kukhona umuntu odubule walimaza okanye wabulala isigilamkhuba ngoba evikela imoto yakhe, makangaboshwa futhi angashushiswa. Izigilamkhuba zinamalungelo amaningi ukwedlula izakhamizi zakuleli.
“Sifuna ukuthi singavalelwa ngaphandle uma kunezingxoxo nohulumeni waseMozambique ngoba kasazi ukuthi yini abafike bavumelane ngayo uma sebesemahhovisi nezikhulu zakuleliya lizwe,” kusho uMnu Ngubane.
UNdunankulu wesizwe sakwaMdluli KwaNibela, eHluhluwe, uMnu Mjaphani Mkhize, uthe:
“Siluzwile udaba lokungenelwa kukababa uNkosi. Sinxusa umphakathi, ikakhulukazi abazali ukuba basukume balwe nale nkinga ngoba idinga ukuthi kubanjiswane. Izigilamkhuba kazisuki eMozambique zizothatha izimoto lapha, kodwa zixhumana nabantu abathile okufanele kuqondwe kubona.”
Okhulumela uMnyango wezokuThutha, ezokuPhepha nokuXhunyaniswa koMphakathi KwaZuluNatal, uMnu Kwanele Ncalane, uthe bayitholile imibiko ngezigameko ezenzeke kusukela ngoLwesihlanu kwaze kwaba wuMgqibelo. Uthe kubikwe ngokushiswa kwezimoto zaseMozambique ezine.
“Siyayiqonda intukuthelo yomphakathi wakuleya ndawo. Ulaka lwawo kufanele lube khona, kodwa siphambene nokuthi uzibambele umthetho,” kusho uMnu Ncalane.
Okhulumela amaphoyisa uLt Colonel Robert Netshiunda, uthe amaphoyisa asezithendeni zabasolwa abawu-5 okusolakala ukuthi bayathinteka esigamekweni sokuthungelwa ngomlilo kwezimoto eziwu-4 emgwaqweni u-R22. Mayelana nodaba lukaMnu Nkosi, ucele inombolo yecala, okungabanga lula ukuyithola njengoba kwayena uMnu Nkosi engatholakali.
Maqondana nesigameko sokutholakala kwezimoto zithukuswe ehlathini eNkomazi, okhulumela amaphoyisa aseMpumalanga, uCapt Selvy Mohlala, uthe lezi zimoto zitholwe ngamasosha akuleli.
“Kulezi zimoto kutholakale ukuthi iLegend 50 intshontshwe kuyona le nyanga. Icala lokwebiwa kwayo lavulwa eSprings, eGoli. IToyota Fortuner yona yantshontshwa eNorth West kubanjwa inkunzi. Uphenyo luyaqhubeka,” kusho uCapt Mohlala.
UCol Athlenda Mathe okhulumela ihhovisi likaNgqongqoshe wamaPhoyisa, uMnu Bheki Cele, uthunyelelwe imibuzo, waqinisekisa ukuthi uyitholile maqede wathembisa ukubuyela kuleli phephendaba. Nokho kuze kwashaya isikhathi sokuloba engabuyelanga kuleli phephandaba.